Парвалі вуха, адбілі ныркі. Расійскі прапагандыст скардзіцца на катаванні на трэнінгу ў Крыме
Рэдактар «РИА Новости» Святаслаў Паўлаў падаў заяву ў Следчы камітэт Расіі з-за жорсткага абыходжання падчас курсаў экстрэмальнай журналістыкі «Бастыён», абавязковых для атрымання акрэдытацыі ў сілавікоў, піша «Медиазона». Без праходжання гэтых курсаў расійскіх журналістаў і прапагандыстаў не пускаюць у гарачыя пункты.
Курсы праходзілі ў верасні на тэрыторыі вайсковай часці, дзе знаходзіцца 810-я гвардзейская брыгада марской пяхоты Чарнаморскага флоту ВМФ Расіі ў анексаваным Севастопалі. Разам з Паўлавым там былі некалькі дзясяткаў іншых журналістаў і прапагандыстаў.
Рэдактар расказаў, што атрымаў траўмы падчас дэманстрацыйнага захопу заложнікаў, які адбыўся раптам падчас адной з лекцый. Па словах журналіста, марпехі ўварваліся і паклалі ўсіх тварам у падлогу. Яму ўдалося вырвацца з будынка, аднак адзін з вайскоўцаў вярнуў яго назад, суправаджаючы свае дзеянні матам, ударамі і абразамі.
Пасля гэтага слухачам курса надзелі на галаву мяшкі, якімі перыядычна душылі. Затым журналістаў і прапагандыстаў пагрузілі ў аўтобусы і павезлі на палігон. У аўтобусе ўдары і здзекі працягваліся.
Таксама іх прымушалі поўзаць па камянях і білі. Калі Паўлаў пачаў задыхацца ў мяшку і страчваць прытомнасць, яму сказалі, што ён забіты.
«І далей пайшлі астатніх катаваць, дзесьці паўгадзіны. Іх палівалі барановай крывёю, стралялі над галовамі, прымушалі скакаць-адціскацца — карацей, нейкае поўнае пекла», — распавёў расійскі прапагандыст.
Пасля захопу ў Паўлава канстатавалі закрытую чэрапна-мазгавую траўму, шматлікія раны твару, тулава, канечнасцей, удар мяккіх тканак грудной клеткі і каленных суставаў, а таксама падазрэнне на страсенне мозгу. Адной з удзельніц курсаў парвалі вуха, іншаму адбілі ныркі.
Паўлаў сцвярджае, што вайскоўцы не адразу пагадзіліся аказаць журналістам медыцынскую дапамогу. Ён і некалькі іншых удзельнікаў «Бастыёна» пакінулі курс датэрмінова.
Прапагандыстаў і журналістаў пасялілі ў казарме, прымушалі шыхтаваць, забаранялі пакідаць тэрыторыю часці. Ніхто загадзя не папярэджваў пра форму і змест курсаў.
