«Ветліва павітаўся, схапіў за валасы і пацягнуў». Як у Полацку 49-гадовая жанчына адбілася ад гвалтаўніка
У Полацку затрымалі 25-гадовага мужчыну, якога падазраюць у замаху на згвалтаванне. Інцыдэнт адбыўся ў мікрараёне Марыненка, дзе размешчаны некалькі інтэрнатаў. 49-гадовая палачанка ішла на прыпынак грамадскага транспарту, калі на яе напаў невядомы, піша kp.by
— Цвярозы, ахайна апрануты мужчына падышоў да жанчыны і ветліва павітаўся. Яна падумала, што ён хоча нешта спытаць, і прыпынілася. Тады мужчына схапіў яе за валасы і пацягнуў у бок цеплатрасы, — распавяла афіцыйны прадстаўнік Полацкага РАУС Юлія Зайцава.
Жанчына не разгубілася і пачала крычаць і біць гвалтаўніка па чым папала. Ён адпусціў яе і збег.
Міліцыя ўстанавіла асобу нападніка. Ім аказаўся мясцовы жыхар, які працуе слесарам. Мужчына арыштаваны па падазрэнні ў замаху на згвалтаванне, распачата крымінальная справа. Яму можа пагражаць пакаранне да сямі гадоў пазбаўлення волі. У Полацку апошнія дзесяць гадоў крымінальныя справы па факце згвалтавання не распачыналіся, адзначыла Юлія Зайцава.