Ад Партыі БНФ на парламенцкія выбары ідуць 50 чалавек. Што гэта за людзі?
Партыя БНФ на з’ездзе, які адбыўся ў Мінску 21 верасня, вылучыла кандыдатамі ў дэпутаты пяцьдзясят чалавек. «НН» атрымала поўны спіс вылучэнцаў. Скажам па некалькі словаў пра кожнага з іх.
Што найбольш звяртае ўвагу, дык гэта той факт, што ад Партыі БНФ вырашылі вылучацца прадстаўнікі «Еўрапейскай Беларусі», якія сёлета масава пайшлі на выбары. Прычым зроблена гэта, як у Мінску, гэтак і ў рэгіёнах.
Як патлумачыў нам старшыня БНФ Рыгор Кастусёў, шмат хто з прадстаўнікоў «Еўрапейскай Беларусі» і раней быў сябрам арганізацыі, як, напрыклад, Максім Вінярскі ці Вольга Мікалайчык, але некаторыя ўступілі ў шэрагі арганізацыі акурат перад выбарамі.
Ірына Амельянчук (Брэсцкая-Цэнтральная акруга №2)
Інжынер-будаўнік, праваабаронца, кіраўнік валанцёрскай ініцыятывы абароны жывёлаў.
Паліна Шарэнда-Панасюк (Брэсцкая-Памежная акруга №4)
Актывістка «Еўрапейскай Беларусі». Выступала супраць будаўніцтва ў горадзе акумулятарнага завода. Неаднаразова затрымлівалася. Рэпетытарка польскай мовы.
Мікалай Чарнавус (Баранавіцкая-Заходняя акруга №5)
Індывідуальны прадпрымальнік, даўно ў пратэстным руху.
Артур Сафін (Белавежская акруга №8)
Настаўнік з Маларыцкага раёна.
Аляксандр Ільінец (Віцебская-Горкаўская акруга №17)
Беспрацоўны, раней працаваў пекарам у краме «Веста».
Аляксей Гаўруцікаў (Віцебская-Чкалаўская акруга №18)
Юрыст, супрацоўнічае з Рухам «За Свабоду».
Уладзімір Сіманковіч (Віцебская-Чыгуначная акруга №19)
Яшчэ адзін прыхільнік Руху «За Свабоду».
Уладзімір Кійко (Віцебская-Кастрычніцкая акруга №20)
Даўні прыхільнік апазіцыі. Арганізоўваў у Віцебску святкаванне 100-годдзя БНР. Прадстаўнік Беларускага нацыянальнага кангрэса.
Кастусь Смолікаў (Гарадоцкая акруга №21)
Старшыня Віцебскай абласной арганізацыі Партыі БНФ.
Вольга Дамаскіна (Наваполацкая акруга №24)
Працавала раней у Полацкім гісторыка-культурным музеі-запаведніку, адкуль была звольненая перад мінулымі выбарамі ў парламент. Цяпер працуе адміністратарам у салоне прыгажосці.
Дзмітрый Казлоў (Аршанская акруга №25)
Вядомы як ютуб-блогер «Шэры кот».
Арцём Касавараў (Гомельская-Юбілейная акруга №31)
Прадстаўнік «Моладзі БНФ». Вучыцца на географа ў Гомельскім дзяржаўным універсітэце імя Скарыны.
Васіль Раманаў (Гомельская-Сяльмашаўская акруга №32)
Доктар Гомельскай гарадской паліклінікі.
Тамара Зайцава (Калінкавіцкая акруга №41)
Вядомая ў Калінкавічах змагарка з карупцыяй, яе вылучэнне падтрымлівае Мікалай Статкевіч.
Міхаіл Бандарэнка (Мазырская акруга №42)
Слесар-мантажнік РУП «Мазырпрамбуд». Яшчэ адзін актывіст «Еўрапейскай Беларусі».
Дзмітрый Савіч (Светлагорская акруга №46)
Беспрацоўны, таксама прадстаўнік «Еўрапейскай Беларусі».
Вадзім Саранчукоў (Гродзенская-Цэнтральная акруга №51)
Намеснік старшыні Партыі БНФ, адказны за працу з рэгіёнамі. Рамеснік.
Максім Губарэвіч (Гродзенскай сельская акруга №53)
Спецыяліст па продажах у кампаніі «Сіці-Бел», якая займаецца продажам рухавікоў, рэдуктараў і г.д.
Сяргей Пантус (Лідская акруга №55)
Жыхар Бярозоўкі. Доўгі час адпрацаваў на шклозаводзе майстрам і брыгадзірам, але звольнены за палітычную дзейнасць. Працаваў на розных фірмах у Мінску.
Вітольд Ашурак (Нёманская акруга №56)
Будаўнік, вядомы ў Лідзе актывіст апазіцыі.
Мурат Мусаеў (Замкавая акруга №57)
Яшчэ адзін актывіст Партыі БНФ з Ліды.
Віктар Марчык (Слонімская акруга №58)
Раней працаваў на слонімскай птушкафабрыцы, цяпер вартаўнік у мясцовым лясгасе.
Сяргей Трафімчык (Шчучынская акруга №60)
Працаваў на шклозаводзе ў Бярозаўцы.
Павел Батуеў (Салігорская акруга №68)
Працуе ў Польшчы інжынерам па абслугоўванні вытворчых ліній на хімічным заводзе.
Андрэй Маркаў (Маладзечанская акруга №72)
Індывідуальны прадпрымальнік, прадстаўнік «Еўрапейскай Беларусі».
Аляксей Сюдак (Вілейская акруга №74)
Працаваў настаўнікам гісторыі ў вёсцы. Краязнаўца.
Ілля Дабратвор (Лагойская акруга №75)
Індывідуальны прадпрымальнік, журналіст. Супрацоўнічаў з шэрагам прарасійскіх інтэрнэт-СМІ. Шматдзетны бацька.
Валерый Рабцаў (Заслаўская акруга №77)
Беспрацоўны, абаронца Курапатаў.
Арсень Чыгір (Бабруйская-Першамайская акруга №79)
Рабочы фабрыкі «Чырвоны харчавік». На мінулых выбарах ішоў як прадстаўнік БХД.
Валерый Каранкевіч (Крычаўская акруга №83)
Быў нават намеснікам старшыні Хоцімскага райвыканкама, кіраваў аграпрамысловым аб’яднаннем. Цяпер пенсіянер.
Сяргей Фамін (Магілёўская-Ленінская акруга №84)
Афіцыйна беспрацоўны, праваабаронца, актыўнічае ў прафсаюзных руху.
Надзея Салаўёва (Магілёўская-Цэнтральная акруга №85)
Маці Ялінкі Салаўёвай, якая адзіная навучалася па-беларуску ў Магілёве.
Мікалай Мяцеліца (Шклоўская акруга №90)
Актывіст з Бялыніч, у свой час быў у «Гавары праўду».
Дзяніс Жораў (Аўтазавадская акруга №92)
Даўні актывіст Партыі БНФ, уваходзіць у Мінскую гарадскую раду.
Рыгор Кастусёў (Купалаўская акруга №95)
Лідар Партыі БНФ, родам з Магілёўшчыны. Доўгі час працаваў у сістэме ЖКГ. Удзельнічаў у прэзідэнцкіх выбарах 2010 года.
Аксана Юшкевіч (Чкалаўская акруга №96)
Індывідуальная прадпрымальніца, прадстаўляе «Еўрапейскую Беларусь».
Мікіта Наглін (Кастрычніцкая акруга №97)
Працуе на дзяржпрадпрыемстве, у электрычных сетках, спецыялістам па сувязі. Мае вышэйшую адукацыю — скончыў Авіяцыйную акадэмію па спецыяльнасці «бортінжынер».
Андрэй Войніч (Грушаўская акруга №98)
Слесар, абаронца Курапатаў. Прадстаўнік «Еўрапейскай Беларусі».
Алена Таўстая (Паўднёва-Заходняя акруга №99)
Прадстаўніца руху салідарнасці «Разам» Вячаслава Сіўчыка. Па адукацыі — фізік. Працавала ў НДІ ЭВМ.
Юрась Меляшкевіч (Ясенінская акруга №100)
Намеснік старшыні Таварыства аховы помнікаў гісторыі і культуры.
Алена Церашкова (Каменнагорская акруга №101)
Доктарка аддзялення сківічна-тваравай хірургіі 11-й гарадской бальніцы.
Васіль Астроўскі (Заходняя акруга №102)
Бізнэсовец, уваходзіў у Раду па развіцці прадпрымальніцтва, шматдзетны бацька.
Павел Юхневіч (Пушкінская акруга №103)
У мінулым адзін з лідараў «Зубра». Цяпер спецыяліст па продажах у кампаніі, якая займаецца гандлем шынаў.
Максім Вінярскі (Кальварыйская акруга №104)
Актывіст апазіцыі з вялікім стажам, шмат разоў затрымліваўся і адбываў арышты. Беспрацоўны.
Васіль Жораў (Старавіленская акруга №105)
Беспрацоўны, прадстаўляе «Еўрапейскую Беларусь».
Дзмітрый Макрыцкі (Коласаўская акруга №106)
Прадстаўнік «Моладзі БНФ».
Зміцер Каспяровіч (Усходняя акруга №107)
Індывідуальны прадпрымальнік. У мінулым — палітвязень. Атрымаў тэрмін за тое, што вывесіў бел-чырвона-белы сцяг над Мінгарвыканкамам.
Васіль Гушча (Каліноўская акруга №108)
Кранаўшчык, прадстаўнік «Еўрапейскай Беларусі».
Вольга Мікалайчык (Уручанская акруга №109)
Кінарэжысёр, адна з найбольш зацятых актывістак апазіцыі.
Арцём Чарняк (Партызанская акруга №110)
Актывіст «Еўрапейскай Беларусі», абаронца Курапатаў.
