Повышава, Башлыкевіч ды іншыя знаўцы «Што? Дзе? Калі?» дапамагаюць знайсці дом бадзяжным катам і сабакам ФОТЫ
Беларускі клуб «Што? Дзе? Калі?» перад пачаткам восеньскай серыі гульняў зладзіў дабрачынную акцыю, каб дапамагчы гадаванцам мінскіх прытулкаў для жывёл знайсці сваіх гаспадароў.
У прэс-службе беларускага клуба «Што? Дзе? Калі?» расказалі, што не чакалі, што акцыя выкліча нечаканы ажыятаж.
«Мы толькі аб’явілі пра гэтую акцыю, якая доўжылася цягам васьмі тыдняў, і ад жадаючых паўдзельнічаць у ёй не было адбою», — расказваюць у прэс-службе.
Знаўцы беларускага «ШДК», сярод якіх Алёна Повышава, Аляксандр Курзінер, Яўген Зайцаў, Вера Рабкіна, Алена Шыбут, Павел Чарняўскі, Ілля Барада, Дар’я Салавей (Шаўцова) і іншыя дзяліліся ў сацыяльных сетках фотаздымкамі жывёл, якія шукаюць гаспадара.
Пакуль з 17 жывёл, якія паўдзельнічалі ў акцыі, дом знайшлі толькі два сабакі і два каты.
«Калі пачалася акцыя, мы самі са здзіўленнем даведаліся, якія чуллівыя людзі нашы знатакі. Напрыклад, Дар’я Салавей забрала з Гурскага сабаку-эпілептыка. А цяпер сама стараецца знайсці дом сабаку, якога знайшла яшчэ ў красавіку. Аляксандр Курзінер з жонкай літаральна тыдзень таму ўзялі на выхаванне маленькае кацяня, якое падабралі на вуліцы. Кацяня настолькі маленькае, што Аляксандр з жонкай вымушаныя па чарзе яго выкормліваць. А Вера Рабкіна і Сяргей Башлыкевіч летам падабралі котку ў пад’ездзе, і цяпер у іх бенгальца Імбрыка ёсць суседка», — расказваюць у прэс-службе.
Дар’я Вераціла расказала «Нашай Ніве», што самае складанае было стрымацца і не забраць усіх жывёл сабе:
«Я жыву ў аднапакаёвай кватэры і на працы бываю па 13 гадзін на суткі, куды мне сабаку», — разважае Дар’я.
Акцыю плануюць праводзіць у кожнае міжсезонне гульняў «Што? Дзе? Калі?»
