Патрыярха Кірыла запрасілі на ўрачыстасці 500-годдзя Жыровіцкага манастыра. Правядуць Сінод РПЦ
Патрыярх Маскоўскі і ўсёй Русі Кірыл запрошаны на святкаванне 550-годдзя здабыцця цудатворнай Жыровіцкай іконы Божай Маці і 500-годдзя з дня заснавання Жыровіцкага мужчынскага манастыра, якое адбудзецца ў маі 2020 года. Пра гэта на пасяджэнні ва ўрадзе рэспубліканскага арганізацыйнага камітэта па падрыхтоўцы і правядзенні ўрачыстасцяў паведаміў упаўнаважаны па справах рэлігій і нацыянальнасцяў Леанід Гуляка, піша БелТА.
Таксама ў плане мерапрыемстваў значыцца правядзенне ў гэты перыяд пасяджэння Святога Сінода Рускай праваслаўнай царквы, чакаецца ўдзел царкоўных іерархаў РПЦ з блізкага і далёкага замежжа.
«З улікам значнасці ўрачыстасцяў мяркуецца, што комплекс мерапрыемстваў прыцягне да ўдзелу шырокае кола грамадскасці, прадстаўнікоў сферы культуры, замежных гасцей, духавенства, вернікаў, — адзначыў Леанід Гуляка. — Напярэдадні святкавання юбілейных дат, з сакавіка па май у абласных цэнтрах, Мінску і іншых гарадах пройдуць навукова-практычныя канферэнцыі, выставы, кінафэсты, круглыя сталы, літаратурныя чытанні, фестывалі, будуць арганізаваны экскурсіі для турыстаў».
