У Столінскім раёне зноў вялікі лясны пажар. Яго ліквідуе авіяцыя
Авіяцыя МНС ліквідуе пажар на Століншчыне, верталёты ўжо больш за 10 разоў скінулі ваду на полымя. Пра гэта паведамляе МНС.
Столінскім выратавальнікам днём 16 верасня паступіла паведамленне аб тым, што ў лясным масіве каля вёскі Альманы побач з ўрочышчам «Копішча» назіраецца дым. Пажар заўважылі ва ўгоддзях Рубельскага лясніцтва Палескага лясгаса — за 10 км на ўсход ад вёскі Альманы.
У час маніторынгу з дапамогай авіяцыі МНС устаноўлена, што гараць трава і хмызняк у балоцістай мясцовасці з рухам пажару на ўсход. Для тушэння да месца вылецелі верталёты Мі-8 і Мі-26 МНС, якія 12 раз скінулі ваду. Да месца пажару былі накіраваны сілы і сродкі Палескага лясгаса і Столінскага раённага аддзела МНС.
Наземнае тушэнне абцяжарана адсутнасцю пад'язных шляхоў і забалочанай мясцовасцю. Пройдзеная фронтам пажару плошча складае арыенціровачна 75 га. Па стане на 8.00 работы па тушэнню працягваюцца, вядзецца авіяцыйны маніторынг становішча.
