Што будзе абмяркоўвацца на маштабнай вераснёўскай выставе «Турбізнэс-2019» у Мінску
Летні турыстычны сезон завяршыўся, і цяпер многія беларускія аматары падарожжаў варожаць: ці падаражэюць туры ў найбліжэйшы час, а калі падаражэюць, то наколькі? І ці ёсць у краіне рэзервы, якія дазволілі б зрабіць таннейшым адпачынак? Пытанні своечасовыя: шмат падзей адбылося пасля мінскага выставачнага форуму «Адпачынак» — галоўнай вясновай турыстычнай падзеі краіны. А наперадзе восень — час рыхтавацца да навагодне-калядных вакацый.
Шукаць адказы на пытанні аб турызме будуць экспаненты і наведвальнікі 26-й міжнароднай турысцкай выставы «Турбізнэс-2019», якая пройдзе ў Мінску з 25 па 27 верасня.
Тэм для абмеркавання дастаткова. Па-першае, новыя правілы гульні на рынку пасля прыняцця абноўленага закона «Аб турызме». Шмат якія турфірмы ўжо агучвалі прагнозы: маўляў, калі дакумент будзе прыняты ў яго цяперашнім выглядзе, то гэта прывядзе да падаражэння турпакетаў, паколькі павялічыцца нагрузка на прадаўцоў тураў.
Але ёсць і прыемныя навіны. Напрыклад, у Беларусь па бязвізавым рэжыме ў студзені-ліпені прыехала каля 174 тысяч турыстаў — на 62% больш, чым за той жа перыяд у мінулым годзе. І іх стане яшчэ больш, калі ў поўную сілу запрацуе аб'яднаная бязвізавая турыстычная зона Брэсцкай і Гродзенскай абласцей. У Дэпартаменце па турызме Мінспорту нядаўна агучылі прапанову вылучыць турызм у асобную галіну эканомікі, каб больш выразна выбудоўваць эканамічную палітыку.
Многіх парадавала навіна аб планах венгерскага лаўкостара Wizz Air адкрыць прамыя рэйсы ў Мінск у наступным годзе. А пад канец лета з'явілася інфармацыя аб тым, што Федэральная антыманапольная служба Расіі вядзе перамовы з беларускімі і казахстанскімі партнёрамі аб стварэнні лаўкостараў, каб павысіць канкурэнцыю ў нізкабюджэтным сегменце авіяпералётаў.
Развіваецца і ўнутраны турызм. Многія новыя кірункі будуць прадстаўлены на вераснёўскай выставе «Турбізнес-2019».
Выстава «Турбізнэс» — традыцыйнае месца сустрэчы дзелавых людзей, якія працуюць у сферы аказання турысцкіх паслуг. За 25 гадоў сфармаваўся склад пастаянных удзельнікаў, якія прадстаўляюць найбуйнейшыя турыстычныя фірмы нашай краіны і замежжа. У 2018 годзе ў тэматычным форуме ўзялі ўдзел 100 фірмаў з 12 краін свету. Праграма выставы яшчэ дапрацоўваецца, будуць і прэзентацыі, і круглыя сталы, і семінары.
Тэматыка выставы, як заўсёды, шырокая: уязны і выязны, спартыўны і прыгодніцкі, рэкрэацыйны, медыцынскі, сямейны і дзіцячы, паляўнічы турызм, прэзентацыя паслуг тураператараў і турагентаў, транспартных кампаній, гасцініц. У экспазіцыі будзе спартовы і турыстычны рыштунак, а таксама спецыяльнае абсталяванне і адзенне. Будуць закрануты тэмы падрыхтоўкі кадраў, страхавання і бяспекі.
26-ю міжнародную выставу «Турбізнэс-2019» праводзіць Нацыянальны выставачны цэнтр «Белэкспа» Кіраўніцтва спраў прэзідэнта сумесна з Міністэрствам спорту і турызму. Яна будзе праходзіць з 25 па 27 верасня па адрасе: г. Мінск, пр-т Пераможцаў, 14.
Кантакты для ахвотных удзельнічаць у экспазіцыі: +375 29 887-95-73, +375 17 334-11-92 (тэл. / Факс). E-mail: [email protected]
