Крыніцы: Смалянкоў меў доступ да ўсіх дакументаў, што тычацца расійскай абаронкі
Алег Смалянкоў. Фота, апублікаванае тэлеканалам RTVI.
Расійскія телеграм-каналы перадаюць, што рассакрэчаны амерыканцамі іх расійскі топ-агент Алег Смалянкоў выконваў, акрамя функцый старшага памочніка Юрыя Ушакова, дарадцы Уладзіміра Пуціна, яшчэ і абавязкі рэферэнта Вайскова-прамысловай камісіі Расійскай Федэрацыі. Гэта значыць, што ён меў доступ амаль да ўсіх дакументаў, што тычацца дзейнасці расейскай абароннай галіны.
Акрамя таго, яго высокі ранг, адпаведны генеральскаму званню, і важныя функцыі ў Маскве даюць падставы меркаваць, што і ў час сваёй працы ў расійскай амбасадзе ў Вашынгтоне ён выконваў функцыі далёкія ад проста загадчыка гаспадаркі, які закупляе тавары для пасольскай крамы.
Смалянкоў збег у ЗША разам з сям'ёй падчас адпачынку ў Чарнагорыі ў 2017 годзе. Амерыканцы купілі яму шыкоўны дом у раёне Вашынгтона. Толькі у 2019 годзе яго новае знаходжанне раскрылі амерыканскія СМІ. Зараз, верагодна, ён будзе жыць у новым месцы пад выдуманым імем.
