Эдуард Хіль: адкуль такое прозвішча? Ад Гіля
На расійскім Першым канале выйшаў фільм пра спевака Эдуарда Хіля. Закадравы голас кажа, што прозвішча «Хіль» незвычайнае для Расеі. У Прыбалтыцы спевака ўспрымалі сваім, у Адэсе — таксама сваім (маюцца на ўвазе тамтэйшыя габрэі). Таму, маўляў, аўтары фільма вырашылі пацікавіцца сапраўдным паходжаннем спевака і звярнуліся ў расійскае Генеалягічнае таварыства.
Там нейкі чалавек у кадры кажа, што з паходжаннем Хіля, які нарадзіўся на Смаленшчыне, усё проста. Гэта вельмі вядомае ў Беларусі прозвішча, там яго маюць і беларусы, і палякі, і габрэі. Гіль — у расійскім вымаўленні гэта гучыць блізка да «хіль» — па-беларуску азначае «снягір».
Праўда, далей спецыяліст у генеалогіі сказаў: «мы паглядзелі, што і бацька, і дзед, і прадзед Эдуарда Хіля спрадвеку былі рускімі людзьмі».
