Дзікае здарэнне пад Брэстам: мама хацела дастаць дзіця з машыны, а яно націснула шклопад'ёмнік і перадушыла ёй шыю
20-гадовая жыхарка Жабінкі трапіла ў бальніцу з прыкметамі механічнай асфіксіі і цялеснымі пашкоджаннямі.
Высветлілася, што жанчына разам з сям'ёй гасцявалі ў вёсцы Старое Сяло. Прыкладна а 16.30 яе непрытомнаю, заціснутаю шклом пярэдніх левых дзвярэй аўтамабіля, знайшоў муж, паведаміў БЕЛТА афіцыйны прадстаўнік абласнога Упраўлення следчага камітэта Дзмітрый Іванюк.
Мужчына разбіў шыбу, вызваліў жонку з пасткі і выклікаў хуткую.
«Паводле папярэдніх звестак, жанчына паспрабавала дастаць двухгадовую дачку з салона машыны праз адкрытае акно. Магчыма, у гэты момант дзяўчынка націснула кнопку шклопад'ёмніка», — распавёў Дзмітрый Іванюк.
Пацярпелая ляжыць у бальніцы. Медыкі ацэньваюць яе стан як цяжкі.
Брэсцкі міжраённы аддзел Следчага камітэта праводзіць праверку, высвятляе ўсе абставіны здарэння.
