«Зборная Белоруссіі». Капітан футбольнай зборнай выклікаў хвалю абурэння ў інстаграме
Капітан «Краснадара» Аляксандр Мартыновіч прыканцы чэрвеня завёў сабе старонку ў інстаграме. Але толькі нядаўна карыстальнікі заўважылі, што футбаліст сябе абазначыў «капітанам нацыянальнай зборнай Белоруссіі».
Няправільная назва краіны абурыла карыстальнікаў, пад допісам з'явіліся дзясяткі негатыўных каментароў.
Аднаму з карыстальнікаў Мартыновіч адказаў, што па-руску так і мусіць пісацца — «Белоруссія».
У каментарах выказваюцца таксама думкі, што футбаліст самастойна акаўнт не вядзе, а ім займаецца прэс-служба «Краснадара».
Дарэчы, летась «Наша Ніва» пытала ў гульцоў зборнай, ці размаўляюць яны па-беларуску. Мартыновіч адказаў, што у школе добра вучыў беларускую мову. А таксама выказаў думку, што нашу мову павінен ведаць кожны. Адметна, што тады абаронца адказваў па-беларуску.
