Знайсці
28.08.2019 / 16:3410РусŁacБел

«Школьныя экзамены цяпер — гэта прафанацыя, і ўсе гэта ведаюць»

Нядаўна Аляксандр Лукашэнка зноў абурыўся на сістэму адукацыі. Незадаволенасць выклікала ЦТ. Кіраўнік краіны анансаваў вялікую нараду напрыканцы года, дзе будзе абмяркоўвацца, ці не варта замяніць тэсты на класічныя вусныя экзамены твар у твар і аб'яднаць выпускныя і ўступныя экзамены.

Дырэктар адукацыйнага цэнтра «Фабрыка ведаў» Аляксандр Луцэвіч тлумачыць, чаму адмова ад цэнтралізаванага тэсціравання была б крокам назад у адборы талентаў.

Дырэктар адукацыйнага цэнтра «Фабрыка ведаў» Аляксандр Луцэвіч.

«ЦТ выключае фактар асабістых інтарэсаў — карупцыю, кумаўство. ЦТ робіць усіх па-добраму роўнымі: адкуль ты, ці ёсць у цябе сувязі — няважна. Тэсціраванне паказвала рэальны стан школьнай адукацыі. Але што ў гэтым кепскага?

Па фізіцы сярэднія балы былі маленькія — 27, 30. Што зрабілі ў апошні год? Праводзіць рэформу адукацыі вельмі цяжка і дорага. Але можна ўзяць і змяніць сістэму падліку, каб маленькія балы павялічыць, а вялікія крыху апусціць. І атрымаецца, што ў школе ў вучня сямёрка, на ЦТ ён набраў 55 балаў, і гэта нармальна. Такое шулерства.

Тое, што можна было натыкаць адказы і набраць нармальныя балы, — гэта праблема новай сістэмы падліку. Я спадзяюся, што сістэму падкарэктуюць. Зрэшты, на выніках паступлення ва ўніверсітэт яна не крытычна адбілася. Калі паглядзець на прахадныя балы, то яны падняліся там, дзе былі маленькімі (на агранома ўмоўна было 130, а стала 170), а на такіх факультэтах, як Факультэт міжнародных адносін, юрыдычны як былі высокія, так і засталіся.

Але нават з гэтымі хібамі ЦТ — адэкватная і справядлівая сістэма. А вусны экзамен нас адкіне ў цемру карупцыі і верне тыя праблемы, якія ўдалося выкараніць.

Аб’яднаць выпускныя і ўступныя экзамены было б лагічна, але толькі калі іх будуць здаваць па сістэме ЦТ. Бо зараз атрымліваецца, што школа не рыхтуе да паступлення ва ўніверсітэт — яна рыхтуе да сваіх выніковых экзаменаў.

Школьныя экзамены цяпер — гэта часцей за ўсё прафанацыя, і ўсе гэта ведаюць.

Там максімум можна падняць ці апусціць адзнаку на адзін-два балы, болей нельга, бо будуць праблемы. Лагічна прыбраць гэтую прафанацыю, але калі рабіць адзін агульны экзамен, то каб яго прымалі па сістэме ЦТ, у выпадкова абранай школе і з незнаёмымі кантралёрамі, каб ацэнка ведаў была сапраўды незалежная. 

Трэба не баяцца напісаць у справаздачах ніжэйшыя балы за экзамен, чым за год.

Але наша сістэма не прадугледжвае такой сумленнасці. Чаму ЦТ і муляе вока шмат каму? Бо яно справядлівае і пры ім цяжка змухляваць».

НЛ

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера