Пад Бабруйскам вясковец прылёг на канапу з іншай жанчынай — сужыцелька выклікала міліцыю
21 жніўня каля 15 гадзіны ў Бабруйскі РАУС патэлефанавала 43-гадовая жыхарка вёскі Вялікія Бортнікі Бабруйскага раёна.
Яна распавяла, што іх госця размясцілася ў іх на канапе адпачыць, а яе сужыцель (жанчыны, якая тэлефанавала) прылёг побач з ёй. Жанчына патэлефанавала ў міліцыю, таму што хацела прагнаць нахабную госцю, але пабаялася, што муж раззлуецца і паб'е яе.
Праваахоўнікі вымушаныя былі ехаць на месца. Бо па тэлефоне немагчыма зразумець, ці з'яўляецца сказанае п'яным трызненнем, альбо чалавеку сапраўды пагражае небяспека. На месцы высветлілася, што ніякай пагрозы жыццю і здароўю не было.
Жыхарка той жа вёскі прыйшла ў госці да знаёмых, разам выпівалі. Калі яна ап'янела, то прылегла на канапу і заснула. Пазней сужыцель гаспадыні дома, таксама ахмялелы, лёг побач з госцяй. Спачатку сужыцелька не надала гэтаму значэння. Але калі злёгку працверазела, у ёй раптам прачнулася рэўнасць. Жанчына не змагла прыдумаць нічога больш разумнага, чым выклікаць міліцыю.
