У Рызе не ведаюць, куды падзець катоў былога мэра
Ніл Ушакоў пакінуў пасаду мэра і пакінуў у Рыжскай думе двух катоў. У галоўнага кандыдата на крэсла кіраўніка горада — алергія на катоў. Лёс жывёл застаецца нявызначаным.
Катоў Ніл Ушакоў узяў з прытулку ў 2011 годзе, прыкладна праз год пасля прыходу ў Рыжскую думу. Мурыса ў Рыжскай думе лічаць інтэлігентным інтравертам, Кузю — зоркай.
Яны «ўдзельнічалі» ў прэс-канферэнцыях мэра, свабодна кантактавалі з журналістамі, не саромеліся камер, шпацыравалі па сталах, здымаліся для рэкламы горада, сустракаліся з гасцямі кіраўніка горада і ўпрыгожвалі яго старонку на фэйсбуку. З часам за катамі замацаваўся нефармальны статус «афіцыйных рыжскіх катоў».
У пачатку красавіка 2019 года Ушакова адхілілі ад выканання абавязкаў мэра, у чэрвені ён афіцыйна пакінуў Рыжскую думу і перайшоў на працу ў Еўрапарламент. Катоў Ніл Ушакоў пакінуў у сваім былым офісе ў Рыжскай думе.
Некалькі месяцаў шматгадовыя партнёры па кааліцыі — партыі «Згода» (партыя Ушакова) і «Гонар служыць Рызе» — спрабавалі падзяліць крэсла мэра, аднак нікому не ўдавалася сабраць большасць галасоў. У гэты час каты працягвалі жыць у офісе кіраўніка горада, дзе амаль нікога не было.
Cамым верагодным кандыдатам на пасаду мэра стаў дзейны віцэ-мэр Алег Бураў.
У Бурава на катоў алергія, паводле яго слоў, катам не месца на стале мэра, а клапаціцца пра жывёл павінна фракцыя «Згоды» ці нейкая сям'я.
«Хачу сказаць, што, па-мойму, на гербе Рыгі былі львы. Давайце не будзем мяняць акцэнтаў», — заявіў Бураў.
У прэс-службе Рыжскай думы паведамілі, што афіцыйным уладальнікам жывёл з'яўляецца Ніл Ушакоў — так запісана ў іх дакументах.
Пакуль лёс катоў застаецца нявызначаным, яны працягваюць жыць у прыёмнай мэра. Іх даглядае сакратар, корм аплачвае сам Ушакоў.
