Саўладальнік найбуйнейшай беларускай сеткі крамаў duty-free купляе ўкраінскі часопіс «Фокус»
Бізнэсмэн Артур Гранц, які з'яўляецца саўладальнікам найбуйнейшай на тэрыторыі Беларусі сеткі магазінаў бяспошліннага гандлю BDF, купляе адно з самых папулярных бізнэс-выданняў на ўкраінскім рынку - часопіс «Фокус», паведамляе ej.by са спасылкай на mind.ua, удакладняючы, што здзелка яшчэ не завершаная.
Артур Гранц (злева), dsnews.ua.
«Фокус» выдаецца з 2006 года. Таксама ў яго структуры функцыянуе штодзённы рэсурс навінаў focus.ua. Выданне вядомае сваёй аналітыкай і эксклюзіўнымі праектамі «Топ-200 самых багатых людзей Украіны», «Топ-100 уплывовых жанчын Украіны» і інш.
Да 2013 года «Фокусам» валодаў вядомы медыя-магнат, фігурант топ-100 самых багатых бізнэсоўцаў Украіны -2019 і заснавальнік холдынгу UMH Group Барыс Ложкін. Перш чым прадаць ў 2013 годзе свае медыя-актывы аднаму з галоўных бізнесменаў януковічаўскага перыяду Сяргею Курчанка, Барыс Ложкін саступіў «Фокус» кампаніі Vertex United Барыса Каўфмана. Той у сваю чаргу ў 2016 годзе перапрадаў выданне яго цяперашняму ўладальніку і прадаўцу Анатолю Еўтухову - гаспадару некалькіх украінскіх радыёстанцый ( «Шансон», DJFM, «Бізнес ФМ», «Любімае»).
Як паведамляе Mind, перазапускам «Фокусу» зоймецца экс-рэдактар «Forbes-Украіна» Уладзімір Фядорын. У 2013 годзе ён пакінуў «Forbes-Украіна» з-за нязгоды з пераходам часопіса пад кантроль Сяргея Курчанка.
Новы магчымы ўладальнік «Фокусу» Артур Гранц мае беларускі пашпарт, але з 2006 года жыве ва Украіне. Яго добрым сябрам мясцовыя СМІ называюць уплывовага народнага дэпутата Вярхоўнай Рады Андрэя Іванчука.
Артур Гранц атрымаў адукацыю ў Беларусі (у БДУ) і тут жа ў пачатку 1990-х зрабіў першыя крокі ў бізнесе і свой першы капітал.
Спачатку галоўным напрамкам яго дзейнасці была пастаўка розных тавараў на расійскі рынак. Асабліва бізнэсмэн меў поспех у продажы цукру, дзе ў сярэдзіне 1990-х гадоў займаў адно з лідзіруючых месцаў. Калі Расія ўзмацніла жорсткасць умоваў паставак цукру на свой рынак, Артур Гранц пераключыўся на лагістыку і інвеставаў спачатку ў Літве, а потым ва Украіне.
Яго галоўная кампанія BF Capital зарэгістраваная на Кіпры. Яна з'яўляецца саўладальнікам нерухомасці і сеткі крам duty-free ва Украіне (у аэрапортах «Барыспаль» і «Жуляны» і ў Ужгарадскай вобласці), а таксама ў Грузіі і Арменіі. Бізнэс у гэтай сферы Артур Гранц вядзе сумесна з адным з еўрапейскіх лідараў у бяспошлінным гандлі, нямецкай кампаніяй Gebr. Heinemann. У 2016 годзе бізнэсмэн вярнуўся на беларускі рынак і стаў уладальнікам найбуйнейшай у Беларусі сеткі магазінаў duty-free - «Беламаркет д'юці фры». Разам з Gebr. Heinemann бізнэсмэн выкупіў 27 магазінаў бяспошліннага гандлю ў Аляксандра Пацёмкіна.
У бізнэсмэна ёсць інтарэсы ў іншых галінах. Ён інвеставаў у завод па вытворчасці сокавага канцэнтрату ў грузінскім Кабулеці. У сярэдзіне 2010-х гадоў Артур Гранц спрабаваў заняцца перапрацоўкай алейных культур і абвясціў аб намеры набыць долю ва ўкраінскім холдынгу «Крэатыў». Але актывы холдынгу былі прададзеныя за даўгі, а сам ён ліквідаваны.
У Беларусі з сярэдзіны 2010-х гадоў Артура Гранца звязваюць з найбуйнейшай у Беларусі сеткай крам ювелірных вырабаў Ziko. У пачатку мінулага года яго кампанія BF Capital стала спонсарам Нацыянальнага алімпійскага камітэта Беларусі. Супрацоўніцтва было разлічана на год. У 2019 годзе партнёрства было падоўжанае яшчэ на адзін тэрмін.
