Саудаўскія жанчыны могуць цяпер падарожнічаць без дазволу. Што гэта мяняе?
Саудаўская Аравія, якую даўно крытыкуюць за парушэнні правоў чалавека, уводзіць шэраг прыкметных паслабленняў для жанчын, у прыватнасці, у тым, што тычыцца свабоды перамяшчэння. Цяпер жанчынам, старэйшыы за 21 год, не патрабуецца дазвол іх мужчын-апекуноў — мужоў, бацькоў ці братоў, — каб зрабіць замежны пашпарт і выехаць за мяжу, піша Бі-Бі-Сі.
Упершыню ў гісторыі жанчынам дазволена афармляць такія дакументы, як пасведчанне аб нараджэнні, шлюбе і разводзе. Паводле новага закона, усе грамадзяне краіны маюць права на працу, не падвяргаючыся дыскрымінацыі па гендарнай і ўзроставай прыкмеце, а таксама па стане здароўя.
Гэтыя перамены на нешта паўплываюць?
Гэта ключавое пытанне. Хоць саудаўцы актыўна хваляць рэформу ў твітары, крытыкі адзначаюць, што меры, законы працуюць толькі на словах у краіне, дзе насамрэч кіруюць традыцыі.
Жанчыны па-ранейшаму павінны атрымліваць згоду мужчын, каб выйсці замуж ці жыць самастойна.
Саудаўскім жанчынам таксама патрэбны дазвол ад сваяка-мужчыны, каб пакінуць турму ці прытулак для ахвяраў хатняга гвалту.
Хэштэг, якія заклікае дазволіць шлюб без згоды апекуна, стаў адным з самых папулярных у твітары пасля абвяшчэння пра рэформу.
Нягледзячы на нядаўнія рэформы Саудаўская Аравія ўвайшла ў апошнюю дзясятку краін у Індэксе гендарнага разрыву на Сусветным эканамічным форуме ў 2018 годзе (з 2017 года яна на два пункты абганяе Іран).
Чытайце таксама:
Іранскі шлях: яшчэ 40 гадоў таму жанчыны хадзілі ў міні-спадніцах, а цяпер не могуць выйсці з дома без хіджаба
