У Жлобіне кіроўца БМЗ вывез з завода пад 14 тон чорнага металу
Раніцай 1 жніўня начальнік аддзялення аховы БМЗ Жлобінскага аддзела Дэпартамента аховы капітан міліцыі Дзмітрый Бежалеў і камандзір узвода капітан міліцыі Віталь Цімафееў правяралі на выездзе праз транспартную прахадную грузавы аўтатранспарт. Да брамы пад'ехаў гружаны шлакам МАЗ 20-тоннік. 25-гадовы кіроўца відавочна нерваваўся, паказваючы дакументы, паведаміла прэс-служба УУС Гомельскага аблвыканкама.
Вонкавы надгляд грузавіка не выявіў парушэнняў. Над гарачым, пад 70 градусаў, шлакам падымаўся пар, так проста груз не праверыш. Але Дзмітрый Бежалеў усё ж вырашыў высветліць, куды паедзе самазвал.
МАЗ паехаў праз лясны масіў на палігон, дзе складуюць шлак. Супрацоўнікі міліцыі з прадстаўнікамі аховы БМЗ рушылі ўслед. МАЗ спыніўся і падняў кузаў для выгрузкі. Спачатку пасыпаўся шлак, а затым круглыя брыкеты металічнай стружкі. Адразу стала зразумелая нервовасць кіроўцы. Малады чалавек незаконна вывез з прадпрыемства амаль 14 тон чорнага металу.
Па факце крадзяжу распачатая крымінальная справа. Падазраваны, жыхар Жлобіна, затрыманы.
