Instagram і WhatsApp пераназавуць
Назву дадаткаў Instagram і WhatsApp дапоўняць удакладненнем «ад Facebook». Пра гэта паведамляе РІА Навіны са спасылкай на выданне The Information.
Абноўленыя назвы будуць адлюстроўвацца ў крамах дадаткаў Apple і Google Play, а таксама ўнутры Instagram і WhatsApp. На экране мабільных прылад дадаткі застануцца пад ранейшымі назвамі.
Прэс-сакратар Facebook Берці Томсан адзначыў, што такія меры дазволяць пазначыць прыналежнасць дадаткаў да кампаніі.
Паводле крыніц, сацсетка такім чынам плануе палепшыць рэпутацыю на фоне скандалаў з-за ўцечкі персанальных звестак.
Расследаванне супраць Facebook пачалі ў сакавіку 2018-га ў сувязі з перадачай асабістай інфармацыі 87 мільёнаў карыстальнікаў аналітычнай кампаніі Cambridge Analytica, якая супрацоўнічала з прэзідэнтам ЗША Дональдам Трампам падчас перадвыбарнай кампаніі.
На падставе атрыманых звестак даследчыкі ацэньвалі палітычныя перавагі выбарцаў і паказвалі ім рэкламу, якая трапляла ў зону іх інтарэсаў. Facebook таксама вінавацяць у парушэнні пагаднення ад 2011 года, у адпаведнасці з якім сацсетка абавязуецца інфармаваць карыстальнікаў аб перадачы звестак іншым дадаткам і пытаць дазволу.
