Даслаць навіну
Знайсці
03.08.2019 / 11:58 33

Маладафронтаўцы 2000-х: дзе яны цяпер

«Малады фронт» быў адной з самых масавых моладзевых арганізацый супраціву. Праз яго шэрагі прайшло некалькі тысяч чалавек. Фактычна толькі да маладафронтаўцаў прымянялі рэпрэсіўны артыкул 193 КК «Удзел у незарэгістраванай арганізацыі». Усе актыўныя маладафронтаўцы праходзілі праз суды і адміністрацыйныя арышты, а некаторыя і праз суткі.

У гэтай публікацыі мы згадаем актывістаў «МФ», пік актыўнасці якіх прыйшоўся на другую палову 2000-х і першыя гады 2010-х.

Зміцер Дашкевіч: цясляр

Павялічыць выяву

Шматгадовы лідар «Маладога фронту». Адбыў два турэмныя тэрміны. У 2006 годзе арыштаваны за «дзейнасць ад імя незарэгістраванай арганізацыі», а ў 2010 годзе, за дзень да выбараў, — нібыта за бойку (разам з паплечнікам Эдуардам Лобавым). Агулам адбыў у зняволенні каля 4 гадоў.

Яшчэ ў турме Зміцер ажаніўся з актывісткай «МФ» Настай Палажанкай. Па вызваленні зарэгістраваў фірму «Цесляры», якая робіць мэблю і іншыя рэчы з дрэва.

Працягвае актыўную грамадскую дзейнасць. Напрыклад, вядзе збор подпісаў за наданне бел-чырвона-беламу сцягу статусу нематэрыяльнай гісторыка-культурнай каштоўнасці.

Але найбольшая актыўнасць Дашкевіча прыходзіцца на Курапаты. Зміцер удзельнічае ў варце ля рэстрана «Паедзем, паядзім». Ставіў ва ўрочышчы драўляны крыжы, якія ў выніку былі спілаваныя ўладамі.

Зміцер — актыўны пратэстанцкі вернік. Жыве ў Мінску.

Наста Дашкевіч (Палажанка): гадуе дзетак і дапамагае мужу

Павялічыць выяву

У «Малады фронт» прыйшла 14-гадовай школьніцай. Была адной з лідарак арганізацыі, калі Дашкевіч знаходзіўся ў зняволенні. У 2012 ажанілася са Змітром Дашкевічам.

«Я гадую траіх беларускамоўных дзетак. Дапамагаю «Цеслярам» з інтэрнэт-маркетынгам і кам’юніці-менеджментам. Праводжу раз на год «Ноч расстраляных паэтаў» разам з мужам. Мінулы год працавала рэгіянальным каардынатарам у грамадска-культурнай кампаніі «Будзьма беларусамі». Аб’ездзіла некалькі дзясяткаў гарадоў Беларусі разам з дасведчаным спікерамі і экспертамі», — расказала Наста Дашкевіч. Жыве ў Мінску.

Артур Фінькевіч: рыэлтар

Павялічыць выяву

Яшчэ адзін палітвязень з ліку «Маладога фронту». У 2006 годзе асуджаны за перадвыбарныя графіці «Мы хочам новага». Атрымаў два гады «хіміі», пакаранне адбываў у Магілёве. За парушэнні ўмоваў утрымання на «хіміі» быў асуджаны да 1,5 года калоніі. Але выйшаў на волю пад ціскам ЕС і ЗША пасля разгляду касацыйнай скаргі. У 2008 годзе сышоў з «МФ» і заснаваў сваю арганізацыю «Маладая Беларусь».

На сёння Артур Фінькевіч працуе рыэлтарам. З’яўляецца каардынатарам ініцыятывы «Месца», якая разам з мясцовымі жыхарамі займаецца вырашэннем сацыяльных і экалагічных праблем у мікрараёнах Чыжоўка, Лошыца і Ангарская. Напрыклад, яны змагаліся за закрыццё сметніка «Прудзішча» (сабралі больш за 2 тысячы подпісаў). Кажа, што палітычнай дзейнасцю не займаецца. Жыве ў Мінску.

Зміцер Хведарук: паступіў вучыцца на пастара

Павялічыць выяву

У 2008 годзе Зміцер Хведарук прадстаўляў «Малады фронт» на сустрэчы з прэзідэнтам ЗША Джоржам Бушам. У перыяд 2006—2008 быў фактычным лідарам «МФ». Арыштоўваўся КДБ, але быў вызвалены праз трое сутак. Актыўны ўдзельнік вулічных акцый пратэсту. Футбольны заўзятар, а таксама пратэстанцкі вернік.

«Працаваў некалькі гадоў настаўнікам пачатковых класаў у прыватнай школцы, цяпер паступіў у Евангельска-рэфармацкую семінарыю Украіны ў Кіеў на дзённа-завочную форму. Калі давучуся, то стану пастарам. Пяць разоў на год па два тыдні цяпер буду бываць у Кіеве. Жанаты. Маю кошку па мянушцы Лізі. Трэнірую аматарскую футбольную каманду «Маланка», якая гуляе ў АЛФ. Сезон склаўся так сабе, пакуль ідзём дзявятымі», — расказаў Зміцер. Жыве ў Мінску.

Алег Корбан: заснаваў арганізацыю «Альтэрнатыва»

Павялічыць выяву

Разам з Настай Дашкевіч, Барысам Гарэцкім, Змітром Хведаруком і Аляксеем Янушэўскім Алег Корбан быў прыцягнуты да суда па артыкуле 193 КК. У выніку Корбан атрымаў штраф 30 базавых велічынь.

«Я працягваю ўдзел у грамадска-палітычным жыцці краіны, у 2007—2012 быў сябрам АГП [Алег Корбан узначальваў штаб Яраслава Раманчука па Мінску — «НН»], узначальваў моладзевую арганізацыю АГП «Маладыя дэмакраты», цяпер з’яўляюся кіраўніком грамадскага аб’яднання «Альтэрнатыва» (зарэгістравана ў Латвіі), бяру ўдзел у шматлікіх сацыяльных акцыях і часам арганізоўваю іх. Апроч грамадскай дзейнасці, працую індывідуальным прадпрымальнікам у сферы паслуг. Жыву ў Мінску. Жанаты, гадую дачку Эмілію», — расказаў Алег.

Пасля Плошчы-2010 Алег Корбан быў арыштаваны па падазрэнні ў арганізацыі масавых беспарадкаў, але выпушчаны з ізалятара 7 студзеня 2011 года.

Барыс Гарэцкі: намеснік старшыні БАЖ

Павялічыць выяву

У свой час быў прэс-сакратаром «Маладога фронту», адказваў за напаўненне сайта. Нядоўга павучыўся ў Польшчы па праграме Каліноўскага, пасля чаго вярнуўся ў Беларусь.

Працаваў таксістам, пасля чаго сышоў у журналістыку. Доўгі час быў карэспандэнтам радыё «Рацыя» ў Мінску. Праз нейкі час яго запрасілі на пасаду прэс-сакратара Беларускай асацыяцыі журналістаў. На апошнім з’ездзе БАЖ быў абраны намеснікам кіраўніка арганізацыі. Жыве ў Мінску, жанаты, гадуе трох дзетак.

Аляксей Янушэўскі: быў прэс-сакратаром «Тарпеда»

Павялічыць выяву

Перад судом па справе «маладафронтаўцаў» за дзейнасць ад імя незарэгістраванай арганізацыі з’ехаў у Чэхію, на судзе не прысутнічаў. Пасля таго, як яму быў прысуджаны штраф, вярнуўся назад у Беларусь.

«Да зімы на працягу некалькіх гадоў займаўся футболам, быў дызайнерам, дыктарам, прэс-аташэ мінскага «Тарпеда», які стаў па рэйтынгу Случака самым белмоўным клубам краіны. Цяпер займаюся інтэрнэт-маркетынгам і графічным дызайнам, час ад часу дапамагаю беларускім некамерцыйным праектам, раблю вокладкі для кніжак, афішы, рэкламу», — расказаў Аляксей. Жыве ў Мінску.

Іван Шыла: заснаваў клінінгавую кампанію

Павялічыць выяву

Яшчэ будучы непаўналетнім, Іван праводзіў дзясяткі самых розных акцый у родным Салігорску разам з братам Іллёй. Яго неаднаразова затрымлівалі з выкарыстаннем сілы. Быў асуджаны за дзейнасць ад імя незарэгістраванай арганізацыі, калі яшчэ быў школьнікам. Дарэчы, перад самымі выпускнымі экзаменамі Шылу выключылі са школы. Гвалтам забралі ў армію, служыў пад Лепелем. У войску яго адпраўлялі на гаўптвахту. У выніку быў камісаваны з арміі па прычыне алергіі.

Вучыўся па праграме Каліноўскага ў Катавіцах і Гданьску, але вярнуўся ў Беларусь. Працаваў эсэмэмшчыкам тэлеканала «Белсат», адкуль быў звольнены са скандалам пасля змяшчэння ў фэйсбуку фота прэзідэнтаў Польшчы Дуды і ЗША Трампа з іранічным подпісам. Заснавальнік клінінгавай кампаніі «Чысты кіт», бізнэс вядзе з братам. Жыве ў Мінску.

Яраслаў Грышчэня: сем гадоў у Польшчы

Павялічыць выяву

Баранавіцкі актывіст «МФ». Яго таксама судзілі па сумнавядомым артыкуле 193. У выніку Грышчэню далі 30 базавых велічынь штрафу. У апошнім слове хлопец заклікаў, каб яго расстралялі.

«Я сем гадоў ужо жыву ў Польшчы. Цяпер з’яўляюся намеснікам кіраўніка фірмы, якая займаецца прамысловым і грамадзянскім будаўніцтвам. Будуем дарогі і масты», — кажа Яраслаў. Жыве ў Варшаве.

Мікола Дземідзенка: мае фірму ў Кіеве

Павялічыць выяву

Хлопец родам з Мёраў Віцебскай вобласці. Быў адным з самых адметных сяброў «МФ». Неаднаразова затрымліваўся і адбываў пакаранні за сваю дзейнасць.

«Тры гады жыву ў Кіеве, там стварыў кампанію па аказанні юрыдычных паслуг», — кажа Мікола. Ён плануе вярнуцца ў Беларусь у перспектыве. Жанаты з Алесяй Раманюк, гадуюць дваіх дзяцей.

Павел Красоўскі: пераехаў з Жодзіна ў Чэрвень

Павялічыць выяву

У 2006 годзе Красоўскага арыштаваў КДБ, яго абвінавачвалі ў тэрарызме. У хуткім часе справу спынілі, Паўла вызвалілі з ізалятара. Павел — лідар жодзінскага «Маладога фронту». Удзельнічаў у галадоўцы пратэсту пасля выключэння з ВНУ.

«Жыву ў Чэрвені, маю свой бізнэс па рамонце бытавой тэхнікі», — коратка адказаў Павел.

Сяржук Гумінскі: Працуе ў сферы дыджытал

Павялічыць выяву

На аршанскага актывіста «МФ» Сяргея Гумінскага заводзілі крымінальную справу за графіці, але ў выніку пераслед спынілі. Сяржук з’ехаў па вучобе ў Польшчу.

«Жыву з сям'ёй у Варшаве. Гадуем цудоўнага сына. Працую на адну карпарацыю, дзе займаюся дыджытал-маркетынгам. Працую ў асноўным з краінамі СНД у якасці стратэга. Лічу, што і цяпер прыношу невялікую карысць Беларусі, бо нясу слова беларускае ў свет дыджытал-маркетынгу, а менавіта аказваю беларускаму бізнэсу падтрымку на беларускай мове. Зрабіў свой маркетынгавы слоўнік, якім карыстаюся ў працы з кліентамі. Цешыць, што ў гэтым сегменце людзі амаль усе — беларускія патрыёты незалежна ад таго, якое прадстаўляюць рэкламнае агенцтва», — расказаў пра сваё жыццё Гумінскі.

Яўген Скрабутан: працуе ў кансалтынгавым агенцтве 

Павялічыць выяву

Яўген сам з Зэльвы, вучыўся ў Гродне, але быў выключаны за сваю палітычную дзейнасць з універсітэта. Павучыўся ў Польшчы на праграме Каліноўскага.

«Жыву ў Берасці, працую над праектам Białoruś po polsku ў фэйсбуку — дапамагаем палякам атрымаць больш інфы пра Беларусь: робім пропускі па бязвізе, арганізоўваем адпачынак і падбіраем бізнэс-партнёраў», — кажа Скрабутан.

Яўген Скрабец: водзіць экскурсіі

Павялічыць выяву

Брэсцкі актывіст «МФ». Шмат разоў затрымліваўся, у 2009 Яўген стаў палітпрызыўніком, калі яго забралі ў войска.

«Ад нядаўняга часу жыву на два гарады — Брэст і Беласток. Працую ў сферы турызму і журналістыкі. Ваджу экскурсіі па Берасці па-беларуску, па-руску і па-польску. Гадую сына, якому год і тры месяцы», — кажа Яўген.

Кася Васільева (Галіцкая): перакладчыца

Павялічыць выяву

Адна з дзяўчат, якія актыўна падтрымлівалі «МФ». Кася родам з Бабруйска, скончыла БДПУ.

«Працую перакладчыкам-фрылансерам у сферы медыя і правоў чалавека, супрацоўнічаю з беларускімі і ўкраінскімі арганізацыямі, гадую дачку, займаюся кіналогіяй як хобі», — апавяла Кася.

Яна замужам за яшчэ адным актывістам «МФ» Раманам Васільевым.

Маўлюда Атакулава: эканаміст у ІТ-канторы

Павялічыць выяву

Некалькі разоў сядзела на сутках, затрымлівалася. За дзейнасць у «МФ» яе хацелі выключыць з БДЭУ. Доўгі час працавала ў грузінскім рэстаране. Цяпер — эканаміст у адной ІТ-кампаніі. Жыве ў Мінску.

Андрусь Цянюта: прадае цукровую вату

Павялічыць выяву

Нейкі час гомельскі маладафронтавец Андрусь Цянюта нават узначальваў арганізацыю. Цяпер ён жыве ў Польшчы, у прыморскім горадзе Калабжэг, вучыцца на праграме Каліноўскага.

«Вучуся на міжнародных адносінах, летам працуем, прадаём цукровую вату на пляжы», — кажа Андрусь.

Алёна Валавік (Макарэвіч): чакае мужа з турмы

Павялічыць выяву

У другой палове 2000-х Алёна была заўважная на ўсіх акцыях пратэсту. Алёна замужам з антыфашыстам Іллёй Валавіком, які цяпер адбывае 10-гадовае зняволенне за хуліганства. Многія бачаць у гэтай справе палітычны падтэкст.

«Была тры гады ў дэкрэце, цяпер у пошуках працы», — кажа яна. Жыве ў Мінску.

Кірыл Атаманчык: турыстычны бізнэс

Павялічыць выяву

Калі супраць Кірыла, які ўзначальваў «МФ» у Жлобіне, завялі крымінальную справу, ён з’ехаў у Вільню, вучыўся ў ЕГУ. Па-ранейшаму працягвае жыць у літоўскай сталіцы.

«Паспяхова скончыў ЕГУ. Атрымаў ступень магістра культурнай спадчыны. Маю ўласны бізнэс у галіне турызму. З’яўляюся актыўным удзельнікам беларускага грамадскага жыцця ў Вільні. Стаў адным з ініцыятараў Першай грамадскай стыпендыі для актыўных беларускіх студэнтаў, якая атрымала назву «Стыпендыя імя А. Смоліча», — кажа Кірыл.

Зміцер Панкавец

1
Вася украинец / адказаць
06.08.2019 / 10:09
Хорошие, не колхозные лица, противоположность лиц во власти. Приятно смотреть. Никто не сидит на шее у гос-ва
0
алесь менски / адказаць
06.08.2019 / 20:11
Из Луки президент, как из меня балерина.
0
алесь менски / адказаць
11.08.2019 / 10:47
БРСМ,это действительно респект. Опасно, в Беларуси, иметь такую точку зрения,
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2018 2019 2020
ПН АЎ СР ЧЦ ПТ СБ НД
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30