Мужчыну ўдарылі нажом у грудзі, але ён звярнуўся ў бальніцу толькі праз суткі
У бальніцу з пранікальным раненнем грудной клеткі даставілі 52-гадовага жыхара сталіцы. Медыцынскім работнікам мужчына растлумачыў, што траўміравалі яго невядомыя людзі на вуліцы, паведамляе міліцыя.
Праваахоўнікі высветлілі, што тымі самымі «невядомымі людзьмі», якія паранілі мужчыну, аказалася блізкая прыяцелька 52-гадовага пацярпелага.
Напярэдадні 37-гадовая жанчына запрасіла да сябе ў госці пацярпелага. Праз некаторы час жанчына папрасіла мужчыну пакінуць яе кватэру, але той адмовіўся. Яны пасварыліся, у выніку жанчына нанесла свайму госцю ўдар нажом у вобласць грудной клеткі. Пасля гэтага мужчына ўсё ж пайшоў дадому і толькі праз суткі звярнуўся па дапамогу да медыкаў.
Пацярпелы растлумачыў, што не хацеў паведамляць пра раненне ў міліцыю з-за таго, што з'яўляецца добрым сябрам сям'і.
Жанчыне пагражае пакаранне ў выглядзе абмежавання волі на тэрмін ад трох да пяці гадоў або пазбаўлення волі на тэрмін ад чатырох да васьмі гадоў.
