У Шаркаўшчыне міліцыянераў зрабілі шэрыфамі. Што гэта азначае
Кліч Радзімы
Эксперымент праводзіцца з 1 мая па 31 студзеня, паведамляе мясцовае выданне «Кліч Радзімы». Робіцца гэта ў мэтах павышэння эфектыўнасці аператыўна-службовай дзейнасці і якасці абслугоўвання насельніцтва.
Задзейнічаныя ў эксперыменце праваахоўнікі надзяляюцца адначасова паўнамоцтвамі супрацоўнікаў крымінальнага вышуку, участковых інспектараў міліцыі і інспектараў па справах непаўналетніх.
То-бок гэта «ўніверсальныя» міліцыянты, якія адказваюць за ўсё, што адбываецца на адміністрацыйным участку.
Гэта дазволіць паменшыць і раўнамерна размеркаваць нагрузку на супрацоўнікаў. Досвед падказвае, што ў сельскай мясцовасці, дзе шчыльнасць насельніцтва невялікая, глыбокая спецыялізацыя кожнай з гэтых службаў не патрабуецца.
Тэрыторыя раёна ўмоўна падзелена на 11 адміністрацыйных участкаў. Павелічэнне колькасці ўчасткаў і, адпаведна, колькасці замацаваных за імі супрацоўнікаў спрыяе скарачэнню часу рэагавання на заявы і паведамленні пра злачынствы і адміністрацыйныя правапарушэнні, а таксама разгляду матэрыялаў праверак.
Навацыя ўжо дала плён.
Выданне адзначае, што такая практыка ўкараняецца і ў іншых абласцях. Участковыя-шэрыфы з'явіліся ў Глускім, Маларыцкім, Бярэзінскім, Акцябрскім і Воранаўскім раёнах.
