Мінская прыбіральшчыца скрала арэндны самакат. А потым выкінула GPS-датчык
Усё пачалося з таго, што ў Савецкі РУУС звярнуўся прадстаўнік прыватнай кампаніі па пракаце электрычных самакатаў. Маўляў, прапаў адзін з самакатаў, паведамляе гарадская міліцыя.
Міліцыя хутка знайшла злодзея, гэта была 55-гадовая прыбіральшчыца аднаго з падземных пешаходных пераходаў сталіцы.
У адзін з дзён яна звярнула ўвагу на электрычны самакат, які стаяў без нагляду, і схавала ў дапаможным памяшканні. Праз некаторы час яна даведалася, што самакат арэндны і на ім маюцца датчыкі адсочвання. Тады яна папрасіла невядомага мужчыну за пляшку спіртнога разабраць самакат і дастаць датчыкі. Калі справа была зроблена, жанчына аднесла самакат дадому і схавала ў падвале.
Жанчына была затрыманая. Яна патлумачыла, што скрала самакат для асабістага карыстання. Сума шкоды склала 1000 рублёў.