Даслаць навіну
Знайсці
13.07.2019 / 18:08 26

«Мне 31 год, я белы мужчына, і грамадства не верыць у мяне ў якасці бацькі». Мінскі тата — пра дыскрымінацыю

Мінчанін Дзмітрый Халімончык паўтара месяца таму стаў татам. І сутыкнуўся з тым, што грамадства не гатова ўспрымаць мужчыну як паўнапраўнага бацьку. У твітары малады тата падзяліўся іранічнымі назіраннямі пра дыскрымінацыю. Дзмітрый заўважае: ён не скардзіцца на жанчын, «якія адабралі ў яго права на бацькоўства». Гэта пра перакос сітуацыі наогул.

Павялічыць выяву

«Мне 31 год, я белы мужчына, і грамадства не верыць у мяне ў якасці бацькі.

Месцамі дзяржава, проста вельмі шмат людзей, у тым ліку і многія, хто нараджаў, лічаць, што бацькі — гэта мама, якая аддае ўвесь час дзіцяці, і мужык, які прыносіць шарыкі да радзільні. Хутчэй за ўсё — крыху нападпітку, «бо сын!».

Крыху шок-кантэнту: адразу пасля родаў мама можа адацца дзіцяці хіба што маральна. Фізічна сіл у яе няма. У якасці доказу выкарыстоўваем геаметрыю. Вымяраем ахоп дзіцяці, глядзім на жанчыну і ўсведамляем, што яна яго нарадзіла. Ёй бы адляжацца тыдзень. І кефірчык.

Але радзільня кажа, што спраўляцца неяк трэба, з татам сустрэнецеся на выпісцы, а пакуль (ад трох дзён і больш) усміхаемся і павольна ідзём на спавіванне.

У звычайную палату мужчыне трапіць нельга. Скажаце: санітарыя. Не, у суседнюю за сценкай у тым жа калідоры, толькі платную — можна. І вось тут, напэўна, разам з упэўненасцю ў сваіх сілах у жанчыны зараджаецца стэрэатып, што тата — гэта пра «дапамагаць», бо ён з дзіцём абыходзіцца не ўмее. Хоць яшчэ тры дні таму з малым абыходзіцца не ўмеў з вас дваіх роўна ніхто.

Ну і калі так думае нават мама, чаго мы чакаем ад астатніх? За паўтара з невялікім месяца бацькоўства я сутыкнуўся наўпрост ці ўскосна з шэрагам выпадкаў «узаконенай» у свядомасці суграмадзян дыскрымінацыі.

Так, мяне яшчэ ніхто не гнаў анучамі ніадкуль, але будзем шчырыя, я маю нядрэнныя шанцы выклікаць здзіўленне, калі на працягу пяці хвілін побач са мной і немаўля не з’явіцца яго мама.

Ок, гэта будзе хутчэй нават замілаванае здзіўленне: «О! Як цудоўна». Але гэта не цудоўна, гэта крыху жахліва і наогул сэксізм.

Да прыкладаў. З вялікай доляй верагоднасці, калі я збяруся ў дэкрэт, гэта выкліча сур’ёзнае неразуменне на рабоце. То-бок па законе я, канечне, магу. Але захаваць умовы працы атрымаецца наўрад ці.

Мужчынскі дэкрэт успрымаецца беларускім наймальнікам як здрада, горш чым пераход да канкурэнта. Бо сяброў на бабу не мяняюць. І на бабу з дзіцём таксама.

Далей — наўпрост з карцінкамі. Індустрыя дзіцячых тавараў уся за рэдкім выключэннем заточана на жанчыну і не верыць у існаванне бацькаў. А ў адзінарогаў верыць.

З простага:

Павялічыць выяву

Так, ёсць і іншае адзенне, але статыстыка бессардэчная, калі цікава — прагуляйцеся па дзіцячай краме. Нам застаецца толькі Дарт Вэйдэр з нятленкай пра бацьку.

Павялічыць выяву

Ведаеце, што гэта? Сумка? Не. Гэта сумка для мамы. Бо з вазком. Тату — машына, маме — пральная. І сумка. Стэрэатыпы мае, стэрэатыпы.

Павялічыць выяву

Класіка фатаграфіі. Знайдзіце фота з мужчынскімі рукамі. Хто яго ведае, можа цэнзура не прапускае, раскамнагляд ці УУС Першамайскага раёна г. Мінска. Ну ці прызнаем ужо нарэшце: падгузак — вельмі складана для мужчыны. Няхай займаюцца лёгкімі рэчамі і не лезуць у тонкія матэрыі.

У кучы публікацый у інтэрнэце ў прынцыпе размова пра маму як адзіную разумную істоту: «Мама можа зрабіць так, можа зрабіць тое». І размова не пра грудное выкормліванне — бытавуха тыпу ўмывання ці даставання сопляў з неакрэплага дзіцячага арганізму. Інтэрнэт у нас не верыць.

У мяне верыць толькі барбершоп з комплекснай стрыжкай «тата+сын». І тое толькі з сынам, дачку мне таксама цырульні не давяраюць.

Павялічыць выяву

Музыка таксама не для дарослых мужчын. Толькі для тых, якія прыйшлі з мамай. Не ведаю, можа, ёсць адмысловыя ноты, якія чуюць толькі жанчыны.

«Алё, Дзіма, што ты баламуціш? Доглядам і выхаваннем дзяцей займаюцца ж менавіта мамы!» — скажа шаноўны чытач. «Дык а што, шаноўны чытач, ім застаецца рабіць?» — скажа Дзіма. Калі нават дурацкі падгузак праграмуе, што патрэбны жаночыя рукі? Так, канечне, ён не жахне токам мужчыну, які да яго датыкнецца. Але і асацыяцый не выклікае.

Інфармацыйная прастора мае няхілы патэнцыял і можа зрушыць з месца гэту гару ціхага смутку, але замест гэтага працягвае фарміраваць аднабокую мадэль. Лягчэй жа паклікаць у рэкламу пару мужчын, каб падаць прыклад і стварыць патэрн, а не чакаць, пакуль гэтыя мужчыны праявяць ініцыятыву і ўжо потым прадаваць ім адрасна падгузкі.

Павялічыць выяву

Я ні разу не ўшчэмлены ў правах, мне ніхто не забараняе займацца дзіцём, і я не скарджуся. Мяне, магчыма, нават цешыць павышаная станоўчая ўвага. Але мая логіка гаворыць, што гэта не тая ўвага, якой варта ганарыцца.

Так, у працоўны час я не дома, але пасля работы я такі ж бацька, а мама таксама адпрацавала сваю змену за дзень. Усім, хто сумняваецца, прапаную пасядзець дзянёк удвух з немаўля.

Маё адзінае адрозненне ад маці — я не магу пакарміць сына на гэтым этапе яго жыцця. У астатнім мы норм.

Таму я хачу, каб роля «бацька» стала такой жа звычайнай, як і роля «мама». Дажылі, карацей: я хачу даказаць інтэрнэту сваё існаванне».

Nina.nn.by

0
maha / адказаць
16.07.2019 / 15:00
Дык і ўчым праблема? Пайшоў і ўзяў адпачынак за доглядам дзіцяці. Ах, працадаўцы недавольныя! Дык з гэтым жанчыны сутыкаюцца дзесяцігоддзямі. Ну і гуляць з вазочкам, паіць, падмываць - гэта не забаронена ні аднаму мужчыне, у чым дыскрымінацыя, у слінгах? Дык і тыя мужчыны сабе могуць павесіць і насіць дзіця. А так, калі мужчына жадае клапаціцца штодзённа пра сваё дзіця - яму толькі плюс, сапраўдныя бацькі так і робяць і чхаць хацелі, што хто пра гэта думае
1
Жвір / адказаць
16.07.2019 / 16:01
Максим Дизайнер ,<баба выколачивает деньги из мягкотелого оленя ><------- Dyk Vy nie čakajcie, nie davodzcie liubuju da bielaha kalieņņia)), jakimi jana pačnie taūčy Vas pad zad... Atrymali zaroblienaje - addajcie sami ! Navošta prymušac` kachanuju chvaliavacca, nervavacca? Addali hrošy - dy idzicie na rabotu z liohkaj... dušoju...:)) Ci nie ??? :))))
3
Максим Дизайнер / адказаць
18.07.2019 / 18:57
Жвір , Очень толсто, аж жир сочится. Но в комментарии интересно другое - это 4 плюса каких-то полоумных, которые готовы отдавать все деньги ленивой бабе, и дальше"идти на работу спокойно".
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2018 2019 2020
ПН АЎ СР ЧЦ ПТ СБ НД
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31