Мінабароны Расіі рассакрэціла цікавую дэталь пра вызваленне Мінска ў 1944 годзе
Архіўнае фота з сайта ria.ru
Міністэрства абароны Расіі адкрыла на сваім сайце мультымедыйны раздзел, прысвечаны 75-годдзю вызвалення сталіцы Беларусі ад нямецка-фашысцкіх захопнікаў, дзе апублікаваныя рассакрэчаныя матэрыялы пра тыя падзеі.
У раздзеле «З Мінска бачыўся Берлін» апублікаваныя гістарычныя дакументы з фондаў цэнтральнага архіва Мінабароны.
Прадстаўленыя дакументы апавядаюць пра вялікую падрыхтоўку да правядзення Мінскай аперацыі, якая дазволіла вызваліць сталіцу Беларусі раней пастаўленых тэрмінаў, аб правядзенні унікальнай артпадрыхтоўкі і масіраваных авіяўдараў і г.д.
Сярод іншых прадстаўленых дакументаў — данясенне, што «нямецкае камандаванне засталі знянацку імклівымі тэмпамі наступу на Мінск».
Ёсць там і цікавая дэталь.
Раніцай 3 ліпеня 1944 года, калі савецкія часткі ўжо ўвайшлі ў Мінск, «зусім не падазраючы аб узяцці горада войскамі Чырвонай арміі, нямецкі знішчальнік «Месершміт-109» прызямліўся на аэрадроме», гаворыцца ў данясенні. «Лётчык, нямецкі лейтэнант, выйшаў з самалёта і спакойна стаў яго аглядаць», - гаворыцца ў дакуменце. Савецкія салдаты захапілі ў палон і пілота, і самалёт.