У меню жодзінскага кафэ з'явіліся бургеры з незвычайнымі назвамі — «Ленінскі» і «Вісарыёнаўскі»
Жодзінскае кафэ вулічнай ежы «Белыя крылы» запусціла незвычайную піяр-акцыю. Цяпер гараджане могуць замовіць у іх дастаўку бургераў «Піянерскі», «Кастрычніцкі», «Першамайскі», «Ленінскі», «Таварыш Востры» і — самая дарагая пазіцыя — «Вісарыёнаўскі».
Для кафэ з беларускамоўнай назвай, буслом на лагатыпе і арнаментам на кубачках ход нечаканы.
— Ну вось вырашылі так. А вам падабаецца? — з усмешкай каментуе савецкія назвы адміністратар кафэ.
Цікавімся, чаму бургер «Вісарыёнаўскі» не назвалі «сталінскім» — па аналогіі з «Ленінскім».
— Бо ён не Сталінскі. Калі б мы хацелі назваць так, мы б зрабілі. Мы палічылі, што гэта не спадабаецца кліентам.
НН: А «Вісарыёнаўскі» — гэта ў гонар каго тады?
— А гэта так, проста імя.
Адміністратар кажа: іх мэтай было хайпануць.
— Мы не хацелі рабіць прапаганду Савецкага Саюзу і камуністычнага ладу, тым больш у 21-м стагоддзі. Наадварот. Нармальны чалавек зразумее такія назвы. Думаю, большасць сучасных людзей ставіцца да гэтага з гумарам. А той, хто хоча бачыць негатыў, паўсюль яго знойдзе.
