Кампартыі Украіны забаранілі ўдзельнічаць у выбарах
Апеляцыйны суд Кіева адмовіўся задаволіць пазоў Камуністычнай партыі Украіны (КПУ), у якім яна прасіла прызнаць проціпраўным і адмяніць пастанову ЦВК аб адмове ў рэгістрацыі кандыдатаў партыі ў дэпутаты на пазачарговых выбарах у Вярхоўную раду, паведамляюць инфармагенцтвы.
Суд лічыць, што ЦВК прыняў правільнае рашэнне, кіруючыся законам «Аб асуджэнні камуністычнага і нацыянал-сацыялістычнага (нацысцкага) таталітарных рэжымаў ва Украіне і забароне прапаганды іх сімволікі». Закон уступіў у сілу 15 мая 2015 года.
Лідар Кампартыі Пятро Сіманенка раскрытыкаваў рашэнне ЦВК.
Пазачарговыя парламенцкія выбары на Украіне прызначаныя на 21 ліпеня. Лідарам парламенцкай гонкі з вялікім адрывам застаецца прэзідэнцкая партыя «Слуга народа», за якую гатовыя аддаць голас 47,5% апытаных. Пераадольваюць пяціпрацэнтны бар'ер партыі «Апазіцыйная платформа - За жыццё» (Юрый Бойка, Вадзім Рабіновіч, Віктар Медвядчук), «Бацькаўшчына» (Юлія Цімашэнка), «Еўрапейская салідарнасць» (Пятро Парашэнка), «Голас» (Святаслаў Вакарчук).
