Выкрадзеная жонка нарвежскага мільянера магла быць забітая
Жонка нарвежскага мільянера 69-гадовая Анне-Элісабет Фалкевік Хаген, аб выкраданні якой было заяўлена ў кастрычніку мінулага года, магла быць забітая. Пра гэта паведаміла ў сераду Нарвежскае тэлеграфнае бюро (НТБ) са спасылкай на паліцыю, пішуць інфармагенцтвы.
«Ёсць вялікая верагоднасць таго, што яна стала ахвярай сур'ёзнага крымінальнага злачынства, і мы лічым менш верагодным тое, што маем справу з выкраданнем з эканамічнымі матывамі. Асноўная гіпотэза змененая і заключаецца ў тым, што яна забітая», - сказаў інспектар паліцыі Томі Брёске.
Ён паказаў, што «выкраданне магло быць інсцэніравана, каб схаваць забойства».
У студзені стала вядома, што зламыснікі скралі жонку буйнога нарвежскага інвестара Тома Хагена 31 кастрычніка мінулага года і запатрабавалі выкуп у памеры 9 млн еўра ў крыптавалюце. Анне-Элісабет знікла з свайго дома ў камуне Лёрэнскуг паблізу Осла.
