НАТА: У Расіі ёсць час да жніўня — пасля мы пачнём адказваць
У аўторак генеральны сакратар НАТА Енс Столтэнберг заявіў на прэс-канферэнцыі ў Бруселі, што ў Расіі ёсць час да жніўня, каб знішчыць свае крылатыя ракеты 9M729, што парушаюць умовы міжнароднай дамовы аб ракетах сярэдняй і меншай далёкасці (ДРСМД), піша bbc.com.
У адваротным выпадку, папярэдзіў Столтэнберг, НАТА прыме меры ў адказ. У расійскай Дзярждуме назвалі заяву Столтэнберга смеху вартай.
Падпісаны ў 1987 годзе дагавор РСМД можа страціць сілу 2 жніўня.
НАТА спадзяецца, што Расія зробіць адказны выбар, але не бачыць прыкметаў таго, што Крэмль гатовы выканаць патрабаванні Паўночнаатлантычнага альянсу і знішчыць ракеты, заявіў генеральны сакратар НАТА.
«Расея працягвае распрацоўку новай ракеты. На тое, каб выратаваць дагавор (ДРСМД), застаецца пяць тыдняў», — дадаў ён.
Па словах Столтэнберга, альянс не плануе размяшчаць у Еўропе новыя ракеты наземнага базавання.
«Наш адказ будзе вывераным, скаардынаваным і абарончым. Мы не будзем паўтараць таго, што робіць Расея. Мы не хочам новай гонкі ўзбраенняў. Але раз Расея размяшчае новыя ракеты, мы павінны быць упэўненыя, што наша абарона застаецца надзейная і эфектыўная», — сказаў Столтэнберг.
У расійскім парламенце адрэагавалі на заяву Столтэнберга са скепсісам.
«Калі казаць пра словы Столтэнберга, то яны проста выклікаюць смех скрозь слёзы. Таму што маецца на ўвазе, што адзін бок — наш — павінен выконваць дамову, а ЗША і НАТА — не павінны. Яны што, прабачце за выраз, дурняў знайшлі — інакш ніяк гэта не назавеш», — заявіў намеснік старшыні камітэта па абароне Дзярждумы Юрый Швыткін у эфіры радыё Sputnik.
Кіраўнік камітэта па абароне Дзярждумы Уладзімір Шаманаў у гутарцы з РІА Навіны назваў Столтэнберга безадказным балбатуном.
Лёс дамовы
Дамова аб ліквідацыі ракет сярэдняй і меншай далёкасці была падпісаная лідарамі ЗША і СССР у снежні 1987 года. Яе называлі пачаткам канца халоднай вайны.
Дакумент забараняе абедзвюм краінам выкарыстоўваць і разгортваць балістычныя і крылатыя ракеты наземнага базавання сярэдняй (1000—5500 км) і малой (500—1000 км) далёкасці.
Іншыя ядзерныя дзяржавы — у тым ліку Кітай — не падпісвалі ДРСМД.
Вашынгтон неаднаразова абвінавачваў Маскву ў парушэнні палажэнняў дакумента з-за распрацоўкі Расіяй крылатай ракеты наземнага базавання 9М729 (SSC-8 па класіфікацыі НАТА), далёкасць якой, па сцверджанні амерыканскага боку, не адпавядае ўмовам дагавора.
Расійскі бок, у сваю чаргу, абвінавачвае ЗША ў размяшчэнні пускавых установак для сістэм СПА ў Румыніі, якія могуць аснашчацца ў тым ліку крылатымі ракетамі сярэдняй далёкасці.
Гаворка ідзе пра комплекс Aegis Ashore, які заступіў на баявое дзяжурства на ваеннай базе Дэвэсэлу ў Румыніі.
