Былы будынак «Мінскдрэва» насупраць «Кароны» купіў буйны дэвелапер
У Мінску ідзе рамонт былога будынка «Мінскдрэва» на Кальварыйскай, 21. У аб'екта змяніўся ўласнік, які ўжо шукае новых арандатараў, піша tut.by.
На Кальварыйскай, 21, у былым будынку філіяла «Мінскдрэў» апошні тыдзень ідзе рамонт: будаўнікі мяняюць старыя вокны, фарбуюць фасад у колер чырвонай цэглы, перарабляюць будынак унутры. Вытворчасць даўно перанеслі за горад, памяшканні былых цэхаў пустуюць з 2012 года.
Як растлумачыў намеснік кіраўніка Маскоўскага раёна Уладзімір Танкевіч, у аб'екта змяніўся ўласнік, новы ўладальнік заняўся рамонтам памяшканняў, але што там будзе ўнутры і якая кампанія купіла будынак, чыноўнік сказаць не гатовы.
На сайце сталічнага забудоўшчыка «Белрэканструкцыя» ўжо ёсць аб'явы пра здачу некалькіх памяшканняў у гэтым будынку ў арэнду, а таксама эскізы інтэр'ераў. Прызначэнне — гандлёва-офіснае.
