Дні культуры краін-удзельніц Еўрагульняў запланаваныя штодзень у фан-зоне каля Палаца спорту РАСКЛАД
Падчас II Еўрапейскіх гульняў у фан-зоне «Палац спорту» пройдуць Дні культуры і традыцый краін-удзельніц. Пра гэта паведамілі БЕЛТА ў фондзе «Дырэкцыя II Еўрапейскіх гульняў 2019 года».
Запланаваны выступленні артыстаў і народных калектываў. На пляцоўцы фан-зоны прадэманструюць нацыянальныя кухні, рамёствы, тэатральныя калектывы і спартыўныя дасягненні удзельнікаў гульняў.
На ўрачыстым адкрыцці фан-зоны, 19 чэрвеня адбудзецца канцэрт Прэзідэнцкага аркестра Беларусі пад кіраўніцтвам Віктара Бабарыкіна з удзелам Руслана Аляхно, Георгія Калдуна, Ірыны Дарафеевай, Івана Вабішчэвіча, Ксеніі Жук, Алёны Ланской, Аляксея Хлястова і Тарыэла Майсурадзэ.
20 чэрвеня — Дзень культуры і традыцый Азербайджана, 21 чэрвеня — Ізраіля. На Дзень культуры і традыцый Вялікабрытаніі 22 чэрвеня запланавана выступленне валыншчыкаў Другога Каралеўскага Ірландскага Палка.
The Royal Irish Regiment Pipers / YouTube
23 чэрвеня — дзень культуры і традыцый Грузіі, 24 чэрвеня — Італіі, 25 чэрвеня — Венгрыі, 26 чэрвеня — Украіны.
У гэты ж дзень, 26 чэрвеня, запланаваны канцэрт з удзелам Нацыянальнага акадэмічнага народнага аркестра Беларусі імя. І. Жыновіча, ансамбля «Харошкі», Аляксандра Саладухі.
27 чэрвеня — Дзень культуры і традыцый Турцыі, 28 чэрвеня — Латвіі, 29 чэрвеня — Расіі.
У Дзень культуры і традыцый Беларусі, 30 чэрвеня, выступяць гурты «Чысты голас», «Ягорава гара», «Палац», Анатоль Ярмоленка і ансамбль «Сябры», DJ Magic Sound, DJ Gleb Glebov, DJ Shane, а таксама адбудзецца трансляцыя цырымоніі афіцыйнага закрыцця II Еўрапейскіх гульняў.
Фан-зона «Палац спорту» будзе дзейнічаць з 19 па 30 чэрвеня з 10.00 да 24.00, а ў дні адкрыцця і закрыцця гульняў да 4-й раніцы.
Падрабязны расклад культурнай праграмы ў фан-зонах можна знайсці тут.
II Еўрапейскія гульні пройдуць у Мінску з 21 па 30 чэрвеня. У спаборніцтвах возьмуць удзел больш за 4 тыс. спартоўцаў з 50 краін, яны будуць спаборнічаць у 15 відах спорту.
