Дэпутаты прынялі ў другім чытанні папраўкі ў антынаркатычны артыкул: ніжняя мяжа зменшана
Палата прадстаўнікоў прыняла сёння ў другім чытанні папраўкі ў арт.328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў). Навацыі прадугледжваюць памяншэнне ніжняй мяжы пакарання з пяці да трох гадоў пазбаўлення волі па ч.2 і з васьмі да шасці гадоў пазбаўлення волі па ч.3, паведамляе БелТА.
Па даручэнні кіраўніка дзяржавы папраўкі ў Антынаркатычнае заканадаўства дадаткова вывучаліся ўсімі зацікаўленымі з улікам важнасці гэтай тэмы для грамадства. Пасля абмеркавання засталіся папраўкі, якія прадугледжваюць змяншэнне ніжняй мяжы пакарання па ч.2 і па ч.3 арт. 328 на два гады. Гэта зроблена для таго, каб індывідуалізаваць пакаранне, каб суддзя мог улічыць абставіны канкрэтнага чалавека.
Пры гэтым верхняя мяжа да 8 гадоў па ч.2 і да 15 гадоў па ч.3 застаецца без зменаў.
Крымінальны закон мае зваротную сілу. Гэта не значыць, што ўсе асуджаныя па ч.2 і 3 арт.328 патрапяць пад дзеянне яе зменаў. Рашэнне ў кожным выпадку будзе прымаць суд.
