Паступленне ў Абласны ліцэй: «Так, на паседжанне трэба ўзяць ксеракопію білета БРСМ»
У сеціва трапіла цікавая памятка для тых, хто паступае ў Мінскі дзяржаўны абласны ліцэй. У ёй прапісана, якія дакументы абавязаны мець пры сабе прэтэндэнты на залічэнне ў 10 клас на паседжанні прыёмнай камісіі. Сярод неабходнага — ксеракопія білета члена БРСМ. «Пры адсутнасці — 6 рублёў для ўступлення», — адзначана ў памятцы.
Атрымліваецца, без членства ў саюзе цяпер не стаць ліцэістам?
— Так, на паседжанне трэба ўзяць ксеракопію білета БРСМ. А калі яго няма, пры жаданні ўступіць. Нікога мы не прымушаем, у нас свабодная ўстанова, — пракаментавала «Нашай Ніве» намесніца дырэктара па вучэбнай рабоце ліцэя Алена Пазнякова. — На вынікі залічэння членства ў БРСМ ніяк не ўплывае, але прахадныя балы ў нас дастаткова высокія.
Фармальна згодна з беларускімі законамі ўсе грамадскія арганізацыі роўныя, у рэальнасці ж у навучальных установах дзейнічае найперш лукашэнкаўскі БРСМ. Аднак факты, каб паступленне ва ўстанову абумоўлівалі членствам у ім, рэдкія.