Каліноўскі наш! Пачынаецца кампанія Kalinouski2019
Цяперашняя беларуская дзяржава ніяк не вызначыцца, хто Каліноўскі ўласна для яе. Дапаможам жа разам зрабіць ёй правільны выбар, бо, як пісаў сам Каліноўскі,
«Не народ для ўрада, а ўрад для народа!».
Увосень адбудзецца перапахаванне паўстанцаў 1863—1864 гадоў, знойдзеных на Замкавай гары ў Вільні. Сярод іх тыя, хто ў якасці пароля выкарыстоўваў словы: «Каго любіш? — Люблю Беларусь! — Дык узаемна!». Першы сярод іх — Кастусь Каліноўскі, да вобраза якога як да заступніка звяртаўся наш народ у найцяжэйшыя моманты ХХ ст., калі яго існаванне знаходзілася пад пагрозаю.
Постаць Каліноўскага, які спрычыніўся да паўставання незалежнай Рэспублікі Беларусь — адна з найбольш паважаных у беларускай гісторыі, ушанаваная ў вялікай колькасці твораў літаратуры і мастацтва. Нездарма ў «Гісторыі беларускай дзяржаўнасці» (2019), выдадзенай Інстытутам гісторыі Нацыянальнай акадэміі навук Рэспублікі Беларусь, пра Каліноўскага сказана, што яго заклік змагацца «за сваё чалавечае і народнае права, за сваю веру, за сваю зямлю родную» стаў нацыянальнай ідэяй беларусаў ХІХ — пачатку ХХ ст.
Аднак сёння супраць Кастуся Каліноўскага як сімвала змагання нашага народа з самымі разнастайнымі захопнікамі вядзецца сапраўдная «інфармацыйная вайна». У яе, відавочна, заангажаваныя і прадстаўнікі афіцыйных уладаў, якія намагаюцца дыскрэдытаваць вобраз аднаго з найважнейшых беларускіх нацыянальных герояў. Сведчанне таго не толькі падручнікі і выказванні асобных палітыкаў, але і імкненне праігнараваць і замаўчаць адну з найважнейшых падзеяў, сведкамі якой мы з’яўляемся, — знаходжанне парэштак Кастуся Каліноўскага і іх урачыстае перапахаванне.
Мы, неабыякавыя грамадзяне Рэспублікі Беларусь, абвяшчаем пачатак кампаніі Kalinouski2019.
Наша мэта — папулярызацыя вобраза Кастуся Каліноўскага. Мы заклікаем далучацца да кампаніі кожнага, хто неабыякавы да імя лідара паўстання 1863—1864 гадоў у Беларусі і Літве, каб годна прадставіць беларускі бок на ўрачыстасцях, якія маюць адбыцца 2 лістапада 2019 года на славутых віленскіх могілках Росы. Менавіта там будуць перапахаваныя парэшткі нашага нацыянальнага героя разам з іншымі паўстанцамі, забітымі ў Вільні ў 1863—1864 гадах.
Сведкам гэтай гістарычнай падзеі павінны быць як мага больш беларусаў!
У апошняе дзесяцігоддзе ў Беларусі актыўна адбываецца ўшанаванне месцаў памяці, звязаных з падзеямі 155-гадовай даўніны. На сёння іх ужо амаль 60. У выніку актыўнай пазіцыі беларуская грамадскасць дамаглася напісання па-беларуску ўсіх прозвішчаў паўстанцаў, парэшткі якіх знайшлі ў Вільні падчас археалагічных раскопак у 2017—2019 гадах.
Кампанія Kalinouski2019 складаецца з некалькіх этапаў, прадстаўленых разнастайнымі мерапрыемствамі. Больш падрабязная інфармацыя будзе змяшчацца ў сацыяльных сетках:
Фэйсбук
Інстаграм
Суполка «Каліноўскі 2019»
Суполка «Каліноўскі — мой герой»
Мы прапануем далучацца да кампаніі Kalinouski2019 ўсіх зацікаўленых!
Гэта ўжо зрабілі гурт «Дзецюкі», які ў межах кампаніі прэзентуе песню «Час касінераў», вядомы вытворца патрыятычнай вопраткі LSTR, які выпусціў новы прынт «Gloria Victis» і «Беларуская музычная альтэрнатыва» (БМА group), якая ладзіць музычную кампанію «UZAJEMNA!/УЗАЕМНА!».
ПАКАЖАМ ЖА РАЗАМ, ШТО НАРОД, У ІМЯ ЯКОГА КАСТУСЬ КАЛІНОЎСКІ ЎЗЫШОЎ НА ШЫБЕНІЦУ, ПАМЯТАЕ СВАЙГО ГЕРОЯ!
