Жыхары Абхазіі абвясцілі бестэрміновы пратэст і перакрылі дарогі
Каўказскі вузел
Жыхары Абхазіі абвясцілі бестэрміновую акцыю пратэсту з-за адмовы ўладаў перанесці выбары прэзідэнта на восень. Пра гэта паведамляе выданне «Каўказскі вузел».
Мітынгоўцы патрабуюць пасунуць дату выбараў, бо асноўны кандыдат на пасаду прэзідэнта ад апазіцыі Аслан Бжанія быў шпіталізаваны ў Маскве ў цяжкім стане. Яго родныя і калегі лічаць, што Бжанію маглі атруціць.
Пратэсты працягваюцца з панядзелка. Жыхары абвясцілі бестэрміновую акцыю і заклікалі цяперашняга прэзідэнта Рауля Хаджымбу выйсці да народа, а затым запатрабавалі яго адстаўкі.
Старшыня гарадскога аддзялення партыі «Амцахара» Мізана Зухба заявіў, што ў краіне аб'яўляецца агульнаграмадзянская акцыя непадпарадкавання і надзвычайнае становішча. Работнікі гарадскога транспарту далучаюцца да страйку, таксама будуць перакрытыя масты і дарогі, якія вядуць у сталіцу Сухум.
