Своечасовая заява МУС: Наша пазіцыя да людзей з нетрадыцыйнай сэксуальнай арыентацыяй нязменная
17 мая адзначаецца Міжнародны дзень барацьбы з гамафобіяй. У сувязі з гэтым над будынкам пасольства Вялікабрытаніі ў Беларусі залунаў вясёлкавы сцяг. Гэта робіцца ўжо не першы год.
Міністр унутраных справаў Ігар Шуневіч.
Летась з рэзкай заявай на гэты конт выступіла Міністэрства ўнутраных справаў. «ЛГБТ-супольнасць, і ўся гэтая барацьба за «свае правы», і сам дзень супольнасці — усяго толькі падробка! Мы — за сапраўднае, яны не пройдуць!» — гаварылася ў заяве МУС.
Сёлета Міністэрства зноў адрэагавала на вясёлкавы сцяг над брытанскім пасольствам. Адмысловая заява з’явілася на сайце ведамства.
«Для нашай краіны гэты дзень значнасці не ўяўляў і не ўяўляе. Прыярытэт сацыяльна-арыентаванай палітыкі беларускай дзяржавы — ахова мацярынства і дзяцінства, абарона інстытута сям'і. Міністэрства ўнутраных спраў стаіць на варце у тым ліку і гэтых каштоўнасцяў.
Наша пазіцыя застаецца нязменнай: штучнае раздзіманне тэмы аднаполых адносін дэструктыўнае, парушае нормы маралі, вядзе да росту злачынстваў сэксуальнага характару ў дачыненні да дзяцей!» — гаворыцца ў заяве.