Макей патлумачыў, чаму Лукашэнка не паехаў у Брусэль
Беларусь спадзяецца, што пагадненне аб спрашчэнні візавага рэжыму і рэадмісіі да канца года будзе падпісана. Пра гэта заявіў кіраўнік МЗС Уладзімір Макей у Брусэлі, дзе праходзіць саміт 10-годдзя Усходняга партнёрства, піша Tut.by.
На саміце, дзе сёння пройдзе сустрэча кіраўнікоў МЗС краін «Усходняга партнёрства», плануецца падвесці вынікі 10-годдзя УП і пазначыць «чаканні на будучыню». З беларускага боку гэтыя чаканні звязаныя з працягам далейшага развіцця адносінаў з ЕС.
— Мы маем намер дамагчыся таго, каб мы падпісалі прыярытэты партнёрства, працэс працы над якімі, на жаль, пакуль прыпынены. Спадзяюся, што да канца года мы прасунемся і ў плане падпісання двух пагадненняў: па рэадмісіі і спрашчэнні візавага рэжыму. Працаваць трэба і над тым, каб заключыць асноўнае пагадненне — аб супрацоўніцтве з ЕС, — заявіў Макей.
На думку кіраўніка МЗС, у любой ініцыятыве, у тым ліку і ў «Усходнім партнёрстве», не можна абысціся без нейкіх шурпатасцяў.
— Не бывае такога, каб краіна была ўсім задаволена, удзельнічаючы ў нейкім інтэграцыйным аб'яднанні або выбудоўваючы свае адносіны з той ці іншай краінай, заўсёды ёсць нейкія нюансы. Важна не зацыклівацца на гэтых негатыўных нюансах, важна знайсці нешта агульнае, якое аб'ядноўвае, каб выйсці на паступальны прынцып развіцця, — лічыць Макей.
Як растлумачыў кіраўнік МЗС, Лукашэнка не прыехаў у Брусэль, бо адносіны Беларусі і Еўрасаюза пакуль не дасягнулі даволі высокага ўзроўню.
— Прыйдзе час, прыедзе і прэзідэнт. Пакуль у нашых адносінах захоўваюцца нейкія абмежаванні. Шчыра жадаю сказаць, што пакуль мы не бачым, што ў рамках нават сённяшніх мерапрыемстваў мы атрымалі б нейкую стоадсоткавую аддачу ад такога візіту. Візіт павінен быць максімальна выніковым і насычаным. Мы зыходзім з такіх падыходаў, але, думаю, у любым выпадку, сустрэчы, якія мы тут правядзем, будуць важныя для ўсіх бакоў.
— То бок Аляксандр Лукашэнка прыедзе ў Брусэль толькі для падпісання аднаго з пагадненняў з ЕС? — удакладнілі журналісты.
— Не будзем прадказваць, — адказаў Макей.
