Суд вынес прысуд экс-старшыні камітэта эканомікі Гомельскага аблвыканкама Карніцкай
Сёння ў Гомелі суд вынес прысуд экс-старшыні камітэта эканомікі Гомельскага аблвыканкама Эльвіры Карніцкай, паведамляе Tut.by.
Фота: Алена Бычкова, Tut.by.
Абвінавачаная папрасіла зачытаць прысуд цалкам. У выніку яго абвяшчэнне доўжылася больш за тры гадзіны.
Суд прызнаў Эльвіру Карніцкую вінаватай у наўмысным насуперак інтарэсам службы ўчыненні службовай асобай з карыслівай і іншай асабістай зацікаўленасці дзеянняў з выкарыстаннем сваіх службовых паўнамоцтваў, што пацягнула прычыненне істотнай шкоды дзяржаўным і грамадскім інтарэсам, і прызначыў ёй пакаранне ў выглядзе 5 гадоў пазбаўлення волі з адтэрміноўкай пакарання на 2,5 года. Таксама яна павінна будзе пакрыць грамадзянскі пазоў на суму больш за 78 тысяч рублёў.
Нагадаем, раней пракурор прасіў для Карніцкай 5 гадоў турмы з канфіскацыяй усёй маёмасці.
Карніцкая сваю віну не прызнала. Экс-старшыня камітэта лічыць, што ўсе доказы, здабытыя следствам, пабудаваныя выключна на домыслах і здагадках, а абвінавачванне заснавана на беспадстаўных сцвярджэннях трох чалавек, з якімі яе нішто не звязвае.
