У Гомелі ўнучка скрала ў бабулі амаль 9 тысяч даляраў
У Гомелі аператыўнікі затрымалі 21-гадовую мясцовую жыхарку, якая скрала ў сваёй бабулі $8,8 тысячы, паведамляе МУС.
Сваячкі жывуць у адным доме. Перыядычна бабуля з'язджае на некалькі дзён на дачу, замыкаючы свой пакой на замок. Нягледзячы на гэта, дзяўчына знайшла спосаб скрасці грошы.
Пацярпелая выявіла прапажу грошай, калі вярнулася дадому з чарговай паездкі на дачу. Пра гэта яна тут жа паведаміла ў міліцыю.
Грошы ўнучка змарнавала на ўласныя патрэбы: частку грошай яна аддала знаёмаму ў якасці кампенсацыі за пабіты ў ДТЗ аўтамабіль, а таксама купіла пыласос, мікрахвалёвую печ, паліто і іншае. $1,3 тысячы ў дзяўчыны канфіскавалі праваахоўнікі.
Дзяўчыну затрымалі, яна знаходзіцца ў ІЧУ. Заведзена крымінальная справа па ч.3 арт.205 КК Беларусі (крадзеж у буйным памеры).
