У Брэсце плануюць пабудаваць яшчэ адзін касцёл ФОТА
Храм святога Казіміра можа з'явіцца ў паўднёва-заходнім мікрараёне №3. Гарвыканкам вынес праект на грамадскае абмеркаванне.
Фота: city-brest.gov.by.
Грамадскае абмеркаванне канцэпцыі будаўніцтва касцёла будзе праходзіць з 29 красавіка па 13 мая. Калі праект будзе ўхвалены, то рымска-каталіцкаму храму святога Казіміра быць.
На гэты момант у Брэсце ёсць тры касцёлы — Узвышэння святога Крыжа на Леніна, святога Язэпа на Суворава і Маці Божай Валадаркі ў завулку Ламаносава.
Пад новую рымска-каталіцкую парафію збіраюцца заняць плошчу ў 0,70 га. У двухпавярховым храме адначасова змогуць знаходзіцца каля 200 чалавек. Акрамя таго, на ўчастку пабудуюць гаспадарчы блок, нядзельную школу, дзіцячыя пляцоўкі і пляцоўку для цвёрдых бытавых адходаў. Тэрыторыю вакол агародзяць вечназялёнымі раслінамі.