У МЗС і Дзяржкамваенпраме абверглі гібель беларускіх спецыялістаў у Сірыі
Інфармацыю пра гібель беларускіх спецыялістаў у Сірыі абверглі як у МЗС, так і ў Дзяржкамваенпраме, паведамляе Tut.by.
Паводле выдання Debka, 13 красавіка Ізраіль нанёс ўдары па Сірыйскім цэнтры навуковых даследаванняў і распрацовак у горадзе Мас'яф. У выніку загінулі і атрымалі раненні іранскія і сірыйскія спецыялісты, а таксама ваенныя эксперты з Беларусі і КНДР.
Чытайце таксама: Ізраільскі СМІ: У Сірыі загінулі беларускія вайсковыя спецыялісты
«Катэгарычна абвяргаем гэтую інфармацыю», — заявіў афіцыйны прадстаўнік МЗС Беларусі Анатоль Глаз.
Прадпрыемства «Белзнешпрамсэрвіс» уваходзіць у структуру Дзяржаўнага ваенна-прамысловага камітэта Беларусі (Дзяржкамваенпрама).
«Пачнем з таго, што «Белзнешпрамсэрвіс» — спецэкспарцёр ваеннай тэхнікі і ракетнымі тэхналогіямі не займаецца. Таксама смею вас запэўніць, што прадстаўнікоў «Белзнешпрамсэрвісу» ў Сірыі няма», — падкрэсліў афіцыйны прадстаўнік Дзяржкамваенпрама Уладзімір Лаўранюк.
І ў МЗС, і ў Дзяржкамваенпраме назвалі публікацыю ізраільскага партала фальсіфікацыяй.