З 15 красавіка ўводзіцца забарона на лоўлю судака
З мэтай захавання папуляцыі судака і стварэння спрыяльных умоў для яго размнажэння, у тым ліку ў пераднераставы і паслянераставы перыяды, у рыбалоўных угоддзях Беларусі з 15 красавіка па 30 мая ўводзіцца забарона на яго лоўлю. У выпадку ненаўмыснага вылаву судака рыбу неабходна адпусціць, піша Звязда.
— За незаконную лоўлю судака ў названы перыяд прадугледжана адміністрацыйная адказнасць з накладаннем штрафу ад 20 да 50 базавых велічынь, магчыма таксама канфіскацыя прылад лоўлі. Пры гэтым за кожную асобіну судака, злоўленую падчас забароны, прыйдзецца пакрыць прычыненую шкоду па трайной таксе — 18 базавых велічынь або 441 рубель. Калі агульная сума шкоды складзе больш за 100 базавых велічынь, можа быць распачата крымінальная справа, — расказалі ў Дзяржаўнай інспекцыі аховы жывёльнага і расліннага свету.
Знаходжанне ў рыбалоўных угоддзях або на прылеглай да іх тэрыторыі на адлегласці да аднаго кіламетра ад берагавой лініі з рыбай, лоўля якой у дадзены час забаронена (судак), без дакументаў, якія пацвярджаюць законнасць валодання рыбай, цягне накладанне штрафу ад 5 да 30 базавых велічынь.
