Беспілотнае паветранае таксі паспяхова выпрабавалі ў Аўстрыі
Першыя выпрабаванні аўтаномнага паветранага таксі EHang 216 правялі ў Аўстрыі. Аэрамабіль з пасажырамі на борце паспяхова здзейсніў некалькі ўзлётаў і пасадак на стадыёне ў Вене, паведамляе аўстрыйскае тэлебачанне.
Як адзначыў міністр транспарту, інавацый і тэхналогій Аўстрыі Норберт Хофер, цалкам рэальна, што ўжо да 2025 года паветраныя таксі пачнуць лётаць па краіне.
«Развіццё гэтай тэхналогіі ідзе вельмі хутка, і тэхнічна яны працуюць выдатна», — сказаў Норберт Хофер.
Вытворчасцю аэрамабілей кітайскай кампаніі EHang займаецца кітайска-аўстрыйскі авіяцыйны канцэрн FACC. Зараз паветраныя таксі рыхтуюць да серыйнага выпуску. Як запэўніў генеральны дырэктар FACC Роберт Махтлінгер, першыя серыйныя аэрамабілі пачнуць вырабляць у Аўстрыі ўжо ў другой палове 2019 года.
