Вакульчык: Так званая грамадзянская супольнасць, шэраг СМІ падключаюцца да кампаній псіхалагічнага ціску на суддзяў
Аб гэтым заявіў старшыня КДБ Валерый Вакульчык на нарадзе па пытаннях удасканалення дзейнасці судоў агульнай юрысдыкцыі, піша БелТА.
Старшыня КДБ адзначыў, што прадстаўнікі судовай сістэмы ў параўнанні з іншымі катэгорыямі службовых асоб з'яўляюцца найбольш падвержанымі спробам ціску з боку ўдзельнікаў працэсу, іх прыхільнікаў. У тым ліку часам фіксуюцца факты спробаў аказання псіхалагічнага ўздзеяння на канкрэтных суддзяў. Пры гэтым падключаюць так званую грамадзянскую супольнасць, шэраг СМІ, праводзяць агітацыйныя кампаніі, публікуюць персанальныя дадзеныя суддзяў і іх сваякоў.
Валерый Вакульчык звярнуў увагу і на асвятленне судовых пасяджэнняў у шэрагу СМІ, калі выхоплівалі з кантэксту тыя ці іншыя эпізоды і падавалі ў перакручаным выглядзе.
«Быццам бы факт паведамілі, але ж рашэнне прымаецца і думка складаецца на падставе разгляду сукупнасці ўсіх доказаў і па выніках ўсяго працэсу. Акрамя таго, што гэта ўплывае на выступ іншых сведак, гэта і спроба паднесці тыя ці іншыя рэчы ў перакручаным выглядзе, увесці ў зман грамадскасць», — сказаў ён.
Па словах старшыні КДБ, усё гэта неабходна ўлічваць, каб мінімізаваць негатыўныя наступствы і імкнуцца данесці да грамадскасці справядлівую і аб'ектыўную інфармацыю.
«Разам з тым мы цвёрда бачым, што гэтыя спробы не дасягаюць свайго выніку і, нягледзячы на ціск, фактаў адмовы ад разгляду вострых крымінальных, адміністрацыйных спраў, спробаў перакладання адказнасці альбо прыняцця супярэчлівых рашэнняў з боку суддзяў не зафіксавана», - заявіў Валерый Вакульчык.
