Лукашэнка раіць чыноўнікам: Губернатар павінен быць на кожным матчы або праз матч, на хакей і на футбол
Аляксандр Лукашэнка сёння ў Баранавічах параіў чыноўнікам папулярызаваць здаровы лад жыцця і спорт на асабістым прыкладзе, перадае БелТА.
«Губернатар павінен быць на кожным матчы або праз матч: на хакей і на футбол. Вы павінны там сядзець і за сабой цягнуць людзей. Дзеці павінны бачыць, што там такія ж пацаны бегаюць. Яны павінны імкнуцца. А калі мы не будзем паказваць прыклад, яны гэтым займацца не будуць», — сказаў Аляксандр Лукашэнка.
Ён пацікавіўся ў чыноўнікаў, якімі відамі спорту яны займаюцца, аднак не пачуў выразных адказаў. Лукашэнка ім параіў хаця б хадзіць па некалькі кіламетраў у дзень.
«Гэта здаецца жартам, але не будзеце хадзіць па пяць кіламетраў як мінімум, доўга не пражывяце. Таму вы жартуйце, як хочаце, але гэта вельмі важна для кожнага», — падкрэсліў ён.
