Улады Гродна дазволілі святкаванне #БНР101. Будуць мітынг, канцэрт і дзіцячыя пляцоўкі
Дзень Волі 2018 года ў Мінску. Фота belsat.eu.
Святкаванне 101-й гадавіны абвяшчэння незалежнасці Беларускай Народнай Рэспублікі адбудзецца ў суботу, 23 сакавіка, у Каложскім парку Гродна, паведамляе Радыё Свабода.
Праграма разлічаная з 13:00 да 17:00. Цяпер арганізатары дапрацоўваюць спіс выступоўцаў. Днямі стане вядомая дакладная праграма сьвяткаваньня.
«У нас вялікі фармат святкавання: фудзоны, фотазоны, дзіцячыя пляцоўкі, канцэрт, выступы. Усё ў поўным аб’ёме. Дазволеная сімволіка, датычная мерапрыемства, і любая зарэгістраваная», — адзначыў адзін з арганізатараў мерапрыемства Вадзім Саранчукоў.
Пачынаецца збор сродкаў на мітынг і канцэрт у Гродне. Як можна ахвяраваць грошы, стане вядома 19 сакавіка.
Улады далі адказ на чарговую заяўку пяці гродзенскіх актывістаў у апошні магчымы паводле заканадаўства дзень, 18 сакавіка. Каложскі парк нешматлюдны і аддалены ад цэнтра. Першую заяўку, каб адзначыць Дзень Волі ў парку Жылібера ў цэнтры горада, Гродзенскі гарвыканкам не задаволіў.
Сёлета гарадзенцам трэці раз запар далі дазвол на святкаванне ўгодкаў абвяшчэння БНР.
