Інфармацыйныя стэнды на новым аўтавакзале ў Брэсце будуць па-беларуску, а аб'яўляць рэйсы будуць, хутчэй за ўсё, па-руску
Новы аўтавакзал у Брэсце будзе часткова беларускамоўным з перакладам на англійскую, паведамляе «Брестская газета».
«Дзеля папулярызацыі мовы інфармацыйныя стэнды будуць на беларускай мове. Наконт астатняга я не ведаю, ці гатовыя мы на эксперыменты. Я не магу з ходу абяцаць вам. Усё вырашае УКБ гарвыканкама», — паведаміў начальнік арганізацыі аўтобусных перавозак «Брэстаблаўтатранс» Барыс Калінін на сустрэчы 12 сакавіка ў офісе «Дзедзiч». Шыльда «аўтавакзал» будзе таксама аформлена на беларускай мове.
Па словах Калініна, цяпер важна запусціць новы аўтавакзал да 1000-годдзя горада, пераехаць са старога, аператыўна дадаць актуальную інфармацыю. Усе астатнія пытанні будуць вырашацца бліжэй да канца года.
Што тычыцца пытання агучкі, то тут станоўчага рашэння пакуль што не прынялі. Дырэктар Брэсцкага аўтавакзала Мікалай Радзюк лічыць, што не ўсе людзі зразумеюць беларускую агучку рэйсаў, у яго практыцы ўжо былі такія прэцэдэнты.
«Ды ўсё праплачана ўжо (маецца на ўвазе агучка рэйсаў — заўв. аўт.). Грошы ж бюджэтныя, на гэта грошай даць не могуць, на тое таксама, але я ж не адзін, мне падтрымка патрэбна. Але можна зрабіць анкетаванне на вакзале. Касіры будуць прадаваць квіткі, а людзі змогуць выбраць рускую ці беларускую мову», — прапанаваў Мікалай Радзюк.
