Расія прыняла на ўзбраенне першыя шасі для ракетных комплексаў уласнай вытворчасці, на замену беларускім
Высокамабільныя шасі, створаныя ў рамках доследна-канструктарскай работы «Платформа-О», у прыватнасці, для ракетных комплексаў «Тополь-М» і «Ярс», прынятыя на ўзбраенне расійскай арміі. Пра гэта паведаміла ў чацвер ТАСС крыніца ў абаронна-прамысловым комплексе Расіі.
«Па рэкамендацыі дзяржкамісіі з улікам паспяховага завяршэння дзяржвыпрабаванняў сямейства высокамабільных модульных шасі «Платформа-О» прынята на забеспячэнне Узброеных сіл», — сказаў суразмоўца агенцтва.
Цяпер рухомыя грунтавыя ракетныя комплексы «Тополь-М» і «Ярс» выкарыстоўваюць шматвосевыя шасі вытворчасці Мінскага завода колавых цягачоў (МЗКЦ).
Крыніца удакладніла, што ў рамках першай партыі ва Узброеныя сілы паступяць пяць узораў з сямейства «Платформы-О», распрацаваных КамАЗам і вырабленых на пляцоўцы АТ «Рэмдызель», у тым ліку тры машыны грузападымальнасцю 25, 50 і 85 т з колавымі формуламі 8х8, 12х12 і 16х16, а таксама цяжкі седлавы і баластавы цягачы (8х8) для транспартавання цяжкай тэхнікі масай да 165 т і буксіравання прычапных сістэм і самалётаў да 400 т.
«Платформа-О» абсталявана электраматорамі для кожнага кола, не мае счаплення, скрынкі перадач, раздатачнай каробкі, прывадных валаў, дыферэнцыялаў, што сур'ёзна зніжае яго вагу. Машына мае рэжым так званага крабавага ходу: усе колы паварочваюцца ў адзін бок, што дазваляе рухацца амаль бокам. Найноўшае шасі дэманстравалася на дынамічным паказе падчас выставы «Войска-2018».
Раней паведамлялася, што падчас вытворчасці ўніфікаваных «Платформа-О» на працягу 10 гадоў адбудзецца паступовы пераход ад машын, што вырабляюцца на МЗКЦ.
Расія спрабавала купіць МЗКЦ. Беларускія ўлады не пагадзіліся і ўзялі курс на супрацу з Кітаем у сферы цягачоў.
