Жыхар Ваўкавыска пералічыў інтэрнэт-махлярам $33 тысячы
Ад дзеянняў інтэрнэт-махляроў пацярпеў 31-гадовы жыхар Ваўкавыска.
Яшчэ ў 2017 годзе жыхар райцэнтра атрымаў прапанову ад кампаніі Exo Capital Markets Limited Global (Trade 12). Яна аказвала фінансавыя паслугі пры правядзенні праз інтэрнэт здзелак з купляй-продажам металаў, нафты, каштоўных металаў.
Ён няўхільна выконваў указанні брокераў кампаніі, у тым ліку ўкладанне ў здзелкі асабістых грошай. За некалькі гадоў пералічыў каля $33 тысяч. Для гэтага мужчына прадаў свой аўтамабіль і ўзяў крэдыт у банку.
У нейкі момант падчас чарговай здзелкі невядомы, скарыстаўшыся дыстанцыйным доступам, здзейсніў за мужчыну дзеянні, з-за якіх яго рахунак абнуліўся. Пасля гэтага брокеры кампаніі запатрабавалі папоўніць рахунак, а пасля адмовы перасталі выходзіць на сувязь.
Мужчына звярнуўся з заявай у праваахоўныя органы. Распачалі крымінальную справу па факце завалодання маёмасцю шляхам падману ў асабліва буйным памеры (ч.4 арт.209 КК).
