Мясніковіч: Беларусь чакае польскія інвестыцыі, а Форт-Трамп стане тэмай дыялогу
Беларусь і Польшча выбралі ў якасці прыярытэту двухбаковых адносін інвестыцыйнае супрацоўніцтва. Аб гэтым заявіў старшыня Савета Рэспублікі Міхаіл Мясніковіч, падводзячы вынікі візіту беларускай парламенцкай дэлегацыі ў Польшчу, паведамляе БЕЛТА.
На перагаворах з прэм'ер-міністрам Польшчы Матэвушам Маравецкім абмяркоўваліся магчымасці далейшага павелічэння двухбаковага тавараабароту, тэмп росту якога ў 2018 годзе склаў 5,3 %. Бакі прыйшлі да высновы, што падыходы таварнага супрацоўніцтва не маюць вялікіх перспектыў, хоць і гэта важны і патрэбны напрамак. «Прыярытэт развіцця двухбаковых адносін — інвестыцыйнае супрацоўніцтва. Мы абмяркоўвалі вельмі многія праекты і прыйшлі да высновы, што трэба даваць пазітыўны сігнал бізнесу (і, у першую чаргу, гэта будзе зроблена польскім бокам), каб прыватныя інвестыцыі больш актыўна заходзілі ў Беларусь», — расказаў Міхаіл Мясніковіч.
На сустрэчы закраналіся таксама пытанні ўзаемадзеяння ў электраэнергетыцы. Дасягнута дамоўленасць аб аднаўленні работы групы па супрацоўніцтве ў гэтай сферы.
Міхаіл Мясніковіч у час перагавораў у Варшаве ўзнімаў тэму будаўніцтва ў Польшчы амерыканскай ваеннай базы «Форт Трамп». «Польскі бок даволі канструктыўна рэагаваў і запэўніваў і на ўзроўні міністра замежных спраў, і прэзідэнта, што гэта ні ў якім выпадку не павінна прывесці да нейкай эскалацыі напружанасці. Польскі бок, мяркую, пачуў нашу занепакоенасць. Будуць адпаведныя дыялогі на ўзроўні міністраў абароны і па лініі міністэрстваў замежных спраў», — праінфармаваў старшыня Савета Рэспублікі.
