Лукашэнка вырашыў не ехаць на Мюнхенскую канферэнцыю па бяспецы. Ён знаходзіцца ў Сочы
president.gov.by
Аляксандр Лукашэнка не прыедзе на Міжнародную канферэнцыю па пытаннях бяспекі, якая пройдзе ў Мюнхене з 15 па 17 лютага. Гэтую інфармацыю прэс-служба форуму пацвердзіла DW ў чацвер.
На пытанне, чаму Лукашэнка вырашыў адмовіцца ад паездкі на форум у Мюнхен, прадстаўнік прэс-службы адказаў: «Калі ласка, патэлефануйце ў Беларусь і спытайце».
Аляксандр Лукашэнка яшчэ ні разу не ўдзельнічаў у працы Мюнхенскай канферэнцыі. Пра тое, што ён не прыедзе, на форуме даведаліся яшчэ напярэдадні. Меркавалася, што 16 лютага ён разам з прэзідэнтам Украіны Пятром Парашэнкам і іншымі палітыкамі возьме ўдзел у дыскусіі пра бяспеку ва Усходняй Еўропе.
Раней кіраўнік Мюнхенскай канферэнцыі Вольфганг Ішынгер заявіў, што ў гэтым годзе яна стане «найважнейшай і найбуйнейшай» за сваю больш чым 50-гадовую гісторыю, нягледзячы на адмову ад удзелу ў ёй цэлага шэрагу высокапастаўленых палітыкаў.
У 2019 годзе ў Мюнхенскай канферэнцыі возьмуць удзел 600 экспертаў у сферы палітыкі бяспекі, у тым ліку 35 кіраўнікоў дзяржаў і ўрадаў, а таксама 80 міністраў абароны і замежных спраў.
Нагадаем, Аляксандр Лукашэнка знаходзіцца ў Расіі з трохдзённым афіцыйным візітам. У праграме — яго перамовы з Уладзімірам Пуціным.